Papa emëron eprorin e përgjithshëm të Fretërve të Vegjël, sekretar të Kongregatës
për Jetën Rregulltare.
Emërim i rëndësishëm në kryesinë e Kongregatës për Institutet e Jetës Rregulltare
e Shoqëritë e Jetës Apostolike, ku papa Françesku thirri për të mbuluar detyrën e
sekretarit të dikasterit, eprorin e përgjithshëm të Urdhërit Françeskan të Fretërve
të Vegjël, atë José Rodríguez Carballo, duke e lartuar, njëkohësisht, në dinjitetin
e kryeipeshkvit. Spanjoll nga Lodoselo, prelati i ri e nisi formimin rregulltar
në Santiago të Kompostelës. Më pas vijoi studimet në Jeruzalem, pranë Rojtarisë së
Tokës Shenjte. U shugurua meshtar në Kishën e Shëlbuesit, në Nazaret, më 1977. Kreu
disa detyra me rëndësi në Urdhër, derisa më 5 qershor 2003 u zgjodh epror i përgjithshëm
i Urdhërit të Fretërve të Vegjël, i 119-ti pasardhës i Shën Françeskut të Asizit,
zgjedhje që u përsërit, më 2009, për gjashtë vjet të tjera. Atë Carballo, poliglot,
njohës i tetë gjuhëve, ndërmjet të cilave edhe greqishtja biblike e hebraishtja biblike,
është autor i një mori artikujsh e librash. Kujtojmë se Fretërit e Vegjël, prej
shekujsh në Shqipëri, kanë luajtur e vijojnë të luajnë një rol tejet të rëndësishëm
në historinë e Kishës Katolike e të Kombit.