Папа: уражанне ад сустрэчы з Хрыстом вядзе да духоўнага міра
Уражанне ад сустрэчы
з Хрыстом стала тэмай кароткай гаміліі папы Францішка падчас св. Імшы раніцай 4 красавіка
ў Доме св. Марты. На яе былі запрошаны супрацоўнікі Ватыканскай тыпаграфіі. Падставай
да разважанняў стала Літургія слова, якая апавядала пра пачуцці, якімі напоўніліся
людзі, убачыўшыя як св. Пётр аздаравіў кульгавага, і вучні, перад якімі з’явіўся ўваскрослы
Хрыстус. “Уражанне – гэта вялікая ласка, гэта ласка Божая”, - сказаў Святы Айцец і
перасцярог ад блытання яго з энтузіязмам балельшчыкаў, які ўзнікае “калі выігрывае
любімая каманда”. “Гэта рэч больш глыбокая”, - сказаў Папа. Ён дадаў, што ласка ўражання
нараджацца падчас унутранай сустрэчы з Хрыстом, у той момант, калі думаеш, што гэта
немагчыма. Сустрэча з сапраўдным Богам пачынаецца нечакана, яна ўражвае і дорыць вялікую
радасць. Але, паводле Пантыфіка, мы не можам заўсёды прабываць у такім стане. “Сапраўды,
гэта не магчыма”, - сказаў Папа і дадаў, што такое пачуцце з’яўляецца толькі пачатковым
крокам. Затым яно пакідае ў душы чалавека духоўнае суцяшэнне і мір, які немагчыма
“ні прадаць, ні набыць”. Пантыфік заклікаў маліцца аб ласцы духоўнага суцяшэння і
духоўнага міра.