Papa: qytetarët janë të thirrur t’i shërbejnë së mirës së përbashkët
Botohet fjalimi i Papës Bergolio, që përmbledh mendimin e tij shoqëror. “Secili
nga ne duhet të rifitojë gjithnjë më konkretisht, identitetin e tij personal si qytetar,
i orientuar në shërbim të së mirës së përbashkët. E nëse qytetari, i thirrur për t’i
shërbyer së mirës së përbashkët, merret për këtë qellim, me politikë, sipas magjisterit,
kjo është formë e lartë e bamirësisë”. Janë disa fragmente të fjalimit të kardinalit
Horhe Mario Bergolio mbajtur me rastin e dyqindvjetorit të kombit argjentinas, botuar
dje nga “L’Osservatore Romano”. Teksti botohet në gjuhën italiane, me titull: “Ne
si qytetarë, ne si popull. Drejt një dyqindvejtori me drejtësi e solidaritet, 2011-2016”,
me një paraqitje nga ipeshkvi Mario Tozo. Fjalimi sheh dritën në Shtëpinë Botuese
të Vatikanit. Etimologjikisht, pohonte kardinali Bergolio, fjala qytetar vjen nga
latinishtja ‘citatorium’. Qytetari është i thirruri për t’i shërbyer së mirës së përbashkët,
i thirruri për të marrë pjesë në shoqëri, për të mirën e saj të përbashkët. Qytetari
nuk është subjekt i marrë veçmas, siç paraqitej nga liberalët klasikë, as grup i paqartë
njerëzish, që me term filozofik njihet si ‘bashkim i grumbullimit”. Është fjala për
njerëz të thirrur për të krijuar një bashkim, të prirur kah e mira e përbashkët,
në një farë mënyre e sistemuar, që quhet ‘uniteti i rendit’. Qytetari hyn në një rend
herë me harmoni, e herë, me dizarmoni, për shkak të krizave e të konflikteve, por
gjithsesi, rend, i krijuar për të mirën e përbashkët. E akoma: “Për të formuar
bashkësinë, secili ka një munus, një detyrë, një impenjim, një mundësi për t’iu kushtuar
të tjerëve. Këto kategori, që vijnë nga trashëgimia historiko-kulturore, kanë rënë
në harresë, të errësuara përballë forcës shtytëse të individualizmit konsumistik,
që di vetëm të kërkojë, të pyesë, të kritikojë, të moralizojë e, i përqendruar vetëm
mbi vetveten, nuk bashkohet, nuk rrezikon, nuk vihet në lojë për të tjerët”. Nuk
mjafton t’i përkasësh një shoqërie, për të qenë qytetar, në kuptimin e mirëfilltë
të kësaj fjale - pohonte kardinali Bergolio - ndonëse ky është një hap i rëndësishëm
në rrugën për t’i përkitur një shoqërie. Personi shoqëror e fiton identitetin e tij
të plotë si qytetar, kur i përket një populli. Ky është kyçi, sepse nuk ka identitet,
pa përkatësi. Sfida e identitetit të njeriut si qytetar, është në përpjestim të drejtë
me mënyrën si e jeton përkatësinë ndaj popullit të vet, nga i cili lind e në gji të
të cilit jeton. Qytetari nuk është grumbulli, masa pa formë. Populli është qytetaria
e impenjuar, reflektive, e vetëdijshme dhe e bashkuar, në shërbim të një objektivi
ose të një plani të përbashkët. Në këtë perspektivë, reflektimi mbi qytetarin,
reflektimi ekzistencial dhe etik, lexojmë në fjalim, arrin kulmin në vokacionin politik,
në thirrjen për të ndërtuar, së bashku me të tjerët, një popull-komb, përvojën e jetës
së përbashkët rreth vlerave e parimeve, historisë, dokeve, gjuhës, fesë, ëndrrave
të përbashkëta. Sfida për të qenë qytetar, përveçse e dhënë antropologjike, kuadrohet
në horizontin e politikës. Flitet, reflektonte Papa i ardhshëm, për thirrjen dhe dinamizmin
e mirësisë, që shtyn në drejtim të miqësisë shoqërore. E nuk është fjala për një
ide abstrakte mirësie, e cila formon një koncept të turbullt të etikës, një ‘eticizëm’,
por për një ide, që zhvillohet në dinamizmin e së mirës, në vetë natyrën e njeriut,
në sjelljet e tij. Janë dy gjëra të ndryshme. Ajo, që e bën njeriun qytetar, është
radhitja në dinamizmin e mirësisë, parë në këndvështrimin e miqësisë shoqërore.
Nuk është reflektimi mbi mirësinë, që krijon rrugë etike, të cilat, në fund të fundit,
mund të çojnë në sjellje e prirje, që nuk e konkretizojnë gjithë aftësinë tonë për
të mirën. Një gjë është mirësia, gjë tjetër, etika abstrakte. Mund të ekzistojë edhe
një etikë pa mirësi. Inteligjenca pa talent e eticizmi pa mirësi janë tipike për ekzistencializmin
mediokër.