Afërsia e Papës me Argjentinën e dëmtuar nga përmbytjet. Dhjetra, viktimat
Shqetësim e afërsi nga ana e Papës Françesku për Argjentinën, e cila këto ditë është
dëmtuar rëndë nga përmbytjet. Viktimat numërohen me dhjetra, ndërsa të shpërngulurit,
me mijëra. Është pikërisht zona e kryeqytetit Buenos Aires ajo, ku shirat e rrëmbyeshëm
s’kanë të pushuar. Në një mesazh për tokën e tij amtare, drejtuar kryeipeshkvit, imzot
Poli, e nënshkruar nga Sekretari i Shtetit, kardinali Tarçizio Bertone, Ati i Shenjtë
shpreh ngushëllimet e tij për të vdekurit dhe u jep Bekimin Apostolik gjithë të tjerëve,
sidomos atyre, që po merren me shpëtimin e njerëzve. Papa Françesku fton gjithashtu,
institucionet civile dhe kishtare, si edhe të gjithë njerëzit vullnetmirë, të çojnë
ndihmat e nevojshme në ato zona, me shpirt bamirësie e solidariteti të krishterë.
Nga Buenos Airesi, të dëgjojmë gazetaren Françeska Ambroxheti, e cila është bërë e
njohur për publikun, pikërisht për miqësinë me Horhe Mario Bergolion e për librin-intervistë
shkruar për të së bashku me Serxho Rubin: Bilanc i rëndë viktimash për kohën
e keqe, në provincën e Buenos Airesit: gati 60 të vdekur, një shifër e përkohshme,
që mund të jetë më e lartë; dhjetra mijëra - të shpërngulurit, për shkak të dëmeve
të pallogaritshme. Veçanërisht e rëndë gjendja në disa lagje të Buenos Airesit dhe
në La Plata, qendra e rajonit, qytet ku ka lindur dhe është rritur edhe presidentja
Kristina Kirshner, e cila shkoi vetë për të parë situatën në këto zona dhe shpalli
tri ditë zie kombëtare për viktimat e kësaj tragjedie. Autoritetet janë të shqetësuara
për ndryshimet e klimës dhe për stuhitë me shi të rrëmbyeshëm, që po përsëriten me
një frekuencë gjithnjë e më alarmuese. Mesazhi i Papës mbërriti gjatë natës dhe u
transmetua menjëherë nga të gjitha televizionet e radiot.