Տիգրանակերտի Ս. Կիրակոս Եկեղեցւոյ Մէջ Ս. Զատկուան Հաւաքը։
Տիգրանակերտի Ս. Կիրակոս եկեղեցւոյ մէջ Կիրակի, Մարտ 31ին, Ս. Զատկուան առիթով հաւաք
մը տեղի ունեցածէ՝ առանց սակայն Ս. Պատարագի մատուցման ( «Մարմարա», «Արմէնփրէս», «Նիուզ»).
Թրքական «Ռատիքալ» թերթը կը գրէ, թէ Ս. Զատկուան օրը Հայ հաւատացեալներ Ս. Կիրակոս Եկեղեցին
հաւաքուեցան, բայց հոգեւորականի չգոյութեան պատ-ճառաւ՝ արարողութիւն չկատարուեցաւ։
Անցեալ Նոյեմբերին, գրեթէ դար մը լռութենէ ետք, Տիգրանակերտի Ս. Կիրակոս Եկեղեցւոյ զանգը
դարձեալ հնչած էր, հոն տեղի ունեցած նորոգութիւններէն ետք: Նշենք, որ 1400 հաւատացեալ
ընդունելու կարելիութիւն ունեցող Սուրբ Կիրակոս եկեղեցին կառուցուած է 1376ին: Մերձաւոր
Արեւելքի ամենամեծը հանդիսացող սոյն եկեղեցւոյ զանգակատունը 1913ին քանդուած էր կայծակի
մը հարուածէն, որմէ ետք տեղւոյն հայերը նոր զանգակատուն կառուցեցին՝ զանգը ձուլելով ոսկիի
եւ պղինձի խառնուրդէ մը: 1914ին, թուրքերը թնդանօթով քանդեցին զանգակատունը, պարզապէս,
որովհետեւ անիկա աւելի բարձր էր շրջակայքի մզկիթներու մինարեթներէն: Սուրբ Կիրակոս եկեղեցին
1980էն ի վեր լքուած էր իր ճակատագրին : Բայց Պոլսոյ մէջ ապրող Տիգրանակերտցի Հայերը
միասնաբար ստեղծեցին Սուրբ Կիրակոս Հիմնադրամը՝ վերանորոգելու համար եկեղեցին: Վերանորոգման
ծախսերու հարիւրէն 70 տոկոսը ապահովեց սոյն Հիմնադրամը, իսկ մնացեալը՝ Տիգրանակերտի Քաղաքապետարանը: