Папа Францішак: нашы слёзы часам патрэбны, каб убачыць Езуса
Раніцай 2 красавіка,
папа Францішак цэлебраваў св. Імшу ў капліцы Дома св. Марты ў Ватыкане, дзе зараз
пражывае. У Эўхарыстыі прынялі ўдзел некаторыя члены Ватыканскай жандармерыі. У сваёй
гаміліі Пантыфік пракаменатаваў урывак з Евангелля, у якім апавядаецца пра сустрэчу
Уваскрослага Хрыста з Марыяй Магдаленай. Святы Айцец нагадаў, што Марыя Магдалена,
гэта тая “грэшніца”, якая абмыла духмяным алеем ногі Езуса, а затым выцерла іх сваімі
валасамі”. “Марыя, гэта тая жанчына, якую выкарыстоўвалі і якой пагарджалі тыя, хто
лічылі сябе справядлівымі”, - сказаў Папа і адначасова падкрэсліў, што яе вельмі любіў
Езус, а таксама прабачыў яе шматлікія грахі. “Гэта жанчына павінна была перажыць
падзенне ўсіх надзей – Езуса, яе любові, больш няма”, - сказаў Святы Айцец і параўнаў
гэты момант з “душэўнай цемрай”.
“Часам, у нашым жыцці акулярамі для таго,
каб убачыць Езуса з’яўляюцца нашы слёзы”, - сказаў Папа і спытаў: “Мы ведзь усе ў
нашым жыцці адчувалі радасць, смутак, боль”, і ў самыя “цёмныя моманты, плакалі?”.
“Ці мелі ласку слёзаў, якія рыхтуюць вочы да таго, каб глядзець і бачыць Пана?”, -
спытаў Святы Айцец.
Пантыфік патлумачыў, што перад абліччам Марыі Магдалены,
“можам таксама і мы спытаць аб ласцы слёзаў”. “Гэта цудоўная ласка... Плакаць па любой
прычыне: з прычыны дабра, нашых грахоў, ласкаў, радасцяў таксама”, - сказаў ён. Паводле
Папы, “слёзы рыхтуюць нас да таго, каб бачыць Езуса”. І Пан дае нам гэту ласку, дае
ўсім нам, каб мы маглі сказаць: “Я бачыў Пана”, не таму што мне аб’явіўся, але таму
што ўбачыў “унутры сэрца”. І ў гэтым сведчанне нашага жыцця: жыву так, таму што бачыў
Пана”, - закончыў Святы Айцец.