Papa Françesku: ashtu si Magdalena, kërkojmë hirin e lotëve për të parë Krishtin e
Ngjallur
Sot në mëngjes, Papa Françesku kremtoi meshën në Shtëpinë e Shën Martës, në praninë
e disa anëtarëve të Xhandarmërisë së Vatikanit. Në homelinë e tij të shkurtër, komentoi
Ungjillin e së Martës pas Pashkëve, i cili flet për takimin e Krishtit me Marinë Madalenë. Skena
është ajo, që tregon Ungjilli sipas Gjonit: Maria Magdalena derdh lot pranë varrit,
sepse korpi i Mësuesit nuk është më. Ajo është gruaja mëkatare, vuri në dukje Papa,
që i parfumoi këmbët e Jezusit dhe i fshiu me flokë, grua e shfrytëzuar dhe e përbuzur
nga ata, që e dinin veten për të drejtë. Por për këtë grua, Jezusi thotë se “ka dashur
shumë, prandaj i falen të gjitha mëkatet e saj të shumta”. Megjithatë, para varrit
bosh, kjo grua e ndjen veten të humbur, nuk ka më shpresë. E për këtë, qan me lot
për faqe e ndjen tisin e territ në shpirt. Megjithatë, tha Ati i Shenjtë, Maria Magdalenë
nuk thotë: “Dështova, nuk është kjo rruga!”, thjesht, qan. “Nganjëherë – shpjegoi
Papa Françesku – syzet për të parë Jezusin janë lotët”. Kur e sheh, Maria Madalenë
u kumton të gjithëve se “Pa Zotin”. E kishte njohur gjatë jetës dhe tani dëshmon për
Të. Ky është shembulli, që duhet ndjekur në jetë, theksoi Ati i Shenjtë. “Të gjithë
ne, gjatë jetës, e kemi ndjerë gëzimin, trishtimin, dhimbjen, por a kemi derdhur lot,
në çastet më të vështira? A e njohim mirësinë e atyre lotëve, që i përgatisin sytë
të shohin Hyjin?” Para Madalenës, që qan, nënvizoi Papa Bergolio, “mund t’i lutemi
edhe ne Zotit për hirin e lotëve. Është hir i bukur… Të derdhim lot për gjithçka:
për të mirën, për mëkatet, për hiret, edhe për gëzimet”. Lotët, vazhdoi Ati i Shenjtë,
na përgatisin të shohim Jezusin. E Zoti, uroi Papa, na dhashtë hirin, që të themi
me jetë: “Kam parë Zotin”, jo sepse m’u duk, por sepse “e pashë brenda zemrës”. Kjo
është dëshmia e jetës, përfundoi Papa Françesku. Të mund të themi: “Jetoj kështu,
sepse kam parë Zotin”.