Գարեգին Բ. Ամենայն Հայոց Կաթողիկոսի Պատգամը Սուրբ Յարութեան Տօնին Առիթով

«Զի կեանս յաւիտենականս ետ մեզ Աստուած,
եւ այս են կեանքն, որ յՈրդին Նորա են»
(Ա Յով. Ե 11):
Սիրելի բարեպաշտ ժողովուրդ,
Բացուող գարնան ջերմութեան եւ նոր կեանքով լցուող բնութեան զարթօնքի հետ մեր հոգիներում այսօր «Քրիստոս յարեաւ» հրեշտակաձայն աւետիսով թեւածում են Յարութեան տօնի յոյսն ու խնդութիւնը՝ նորոգելով ու զօրացնելով մեզ վստահութեան մէջ, որ «Աստուած յաւիտենական կեանք տուեց մեզ, եւ այդ այն կեանքն է, որ Նրա Որդու մէջ է»:
Առաքեալի այս խօսքը վկայում է մարդկութեան պատմութեան ընթացքը վերափոխած իրադարձութեան մասին, որը կատարուեց, երբ խաչուած եւ գերեզմանում դրուած Քրիստոս յարութիւն առաւ մահուանից: Այդ պահից մահն իշխանութիւն չունի մարդկանց վրայ, մեղքը քաւուած է, մահուան թագաւորութիւնը խորտակուած: Գերեզմանից այն կողմ փրկութեան ու յաւիտենական կեանքի լոյսն է, որ պայծառօրէն շողում է այսօր մեր հոգիներին՝ նորոգելով մեզ մեր յոյսի ու հաւատքի մէջ:
Քրիստոսի Յարութեան հաւատքը ուժ եւ զօրութիւն է բերում միշտ վեր յառնելու եւ ապրելու այն կեանքը, որ Աստուծոյ Որդու մէջ է: Այդ կեանքի հիմքը սէրն է, նուիրաբերուող սէրը, այն սէրը, որով Աստուծոյ Որդին աշխարհ եկաւ, փրկչական Իր առաքելութիւնը իրականացրեց եւ պատգամեց Իր աշակերտներին ու հետեւորդներին ասելով. «Նոր պատուիրան եմ տալիս ձեզ, որ սիրէք միմեանց» (Յովհ. ԺԳ 34): Մարդկային կեանքի հիմքում Քրիստոս դրեց սէրը, որպէսզի կատարեալ լինի մարդը, եւ ոչինչ չպակասի մարդուն: Սէրը ստեղծում է, կերտում ու հաստատում եւ ոչ՝ կործանում. լուսաւորում է, յուսադրում, խինդ ու երանութիւն է պարգեւում եւ ոչ՝ անորոշութեան ու վհատութեան մատնում, վիշտ ու տրտմութիւն բերում: Սէրը բարիքի ու երջանկութեան աղբիւրն է, վէմն է խաղաղութեան ու արդարութեան, քաջալերութիւնը՝ միմեանց աջակցութեան ու զօրակցութեան՝ յանուն մարդկութեան բարօր, միշտ զարգացող առաջընթաց կեանքի:
Այսօր Քրիստոսի Յարութեան տօնի բերկրանքի հետ Մեր սրտում նաեւ ափսոսանքն է, որ մարդկութեան կեանքում ամէնուր եւ մշտապէս չի դրսեւորուում մեր Տիրոջ պատգամած սէրը մարդու եւ Աստուծոյ ողջ արարչագործութեան հանդէպ: Երկու հազարամեակ քարոզուող քրիստոսապատուէր սիրոյ սերմերը ընկնում են յաճախ Աստծուց հեռացած հոգիների անբերրի ապառաժի վրայ, կամ արդիւնք չեն տալիս մարդկային անհոգութեան պատճառով, եւ կամ չարն է յափշտակում Տիրոջ կողմից սերմանուածը՝ սփռելով որոմ եւ մոլորեցնելով մարդկանց առ բարին ընթացքների մէջ: Ներկայիս աշխարհաքաղաքական ու ֆինանսատնտեսական բարդ զարգացումները, զօրացող անձնակենտրոն մտածողութիւնը, հոգեւոր-բարոյական արժէքների անտեսումը նոր հակասութիւններ ու հակամարտութիւններ, խնդիրներ ու հոգսեր են առաջ բերում հասարակութիւնների կեանքում եւ մարդկային յարաբերութիւններում: Խաղաղ ու ներդաշնակ կեանքը խաթարող այսպիսի իրողութիւններից վեր յառնելու ուղին է լուսաւորում այսօր հնչող աւետիսը Քրիստոսի Յարութեան՝ բերելով պատգամը այն կեանքի, որ Աստուծոյ Որդու մէջ է: Իրական է այդ կեանքը, մատչելի եւ հասանելի ամենքիս: Երբ մարդկային խոհերն ու գործերը ծնունդ են առնում եւ առաջնորդուում Աստուծոյ հանդէպ հաւատքով ու միմեանց հանդէպ սիրով, դա Քրիստոսի մէջ եղող կեանքն է: Երբ խնամքն ու աջակցութիւնը հասարակութեան նկարագիրն ու բնական վիճակն են, դա Քրիստոսի մէջ եղող կեանքն է, երբ 30 արծաթով չեն հարթուում յուդայական կեղծիքի ու մատնութեան ուղիները եւ պիղատոսեան անտարբերութեամբ անարդարութիւններ չեն իրագործուում, դա այն կեանքն է, որ Քրիստոսի մէջ է, երբ նեղութեան, թէ լիութեան մէջ աղօթքը եւ առ Աստուած փառաբանութիւնն են մարդկանց շուրթերին, ու ընտանիքներում հասակ են առնում բարեպաշտ զաւակներ՝ դա այն կեանքն է, որ Քրիստոսի մէջ է, եւ որին Աստուծոյ բարեխնամ շնորհով կանչուած է մարդկութիւնը:
Սիրելի բարեպաշտ ժողովուրդ, այսօր մեզ համար շարունակում են մտահոգիչ մնալ հայրենական եւ ազգային մեր կեանքը յուզող լուրջ մարտահրաւէրները՝ Ղարաբաղի հիմնահարցը, մեր երկրի շրջափակումը, սոցիալ-տնտեսական խնդիրները, արտագաղթը, կեղծ արժէքների ու բարքերի ներթափանցումը: Անհանգստացնող են նաեւ վհատութեան, վատախօսելու տրամադրութիւնները, փոխադարձ վստահութեան պակասը, միմեանց ունկնդիր լինելու անպատրաստակամութիւնը եւ անհաշտ պարտադրանքը սեփական ճշմարտութեան: Վանենք մեզանից այսպիսի դրսեւորումները: Մեր ճշմարտութիւնը նորանկախ Հայաստանն է՝ դարերի անմար երազը մեր պապերի ու հայրերի. ազատագրուած Արցախը՝ մեր ոգու նորօրեայ հերոսացումը, մեր հպարտ յաղթանակը: Մեր ճշմարտութիւնը նեղութեան, դժուարութիւնների դիմակայող մեր ժողովուրդն է, պատերազմի սպառնալիքի ներքոյ հայրենի սահմանները պաշտպանող Հայոց բանակը, աշխարհասփիւռ մեր համայնքներն են՝ հանապազ մարտնչող ազգային եւ հոգեւոր ինքնութեան համար, այսօր վտանգուած, հիւծուող սիրիահայ համայնքն է՝ կարօտ սատարումի ու աջակցութեան: Այս իրողութիւններն են մեր առջեւ, սիրելի բարեպաշտ ժողովուրդ: Մեր Հայրենիքի հզօրացման, մեր ծաղկուն կեանքի կառուցման, ազգային վերածնութեան ու զարթօնքի մեր տեսիլքների ու իղձերի իրագործման համար մէկ ճանապարհ ունենք՝ այն կեանքը, որ Աստուծոյ Որդու մէջ է: Փրկչի յարութեան աւետիսով նորոգենք մեր ուխտը Աստուծոյ հետ, գօտեպնդուենք հաւատքով, յարուցեալ կեանքի յոյսով՝ յաղթահարելու համար առկայ նեղութիւններն ու դժուարութիւնները: Մերժենք մեր կեանքից երկիւղ, վհատութիւն եւ ամէն տարակոյս, որ կարող են ջլատել մեր ժողովրդին ու մեր միասնականութիւնը, եւ միմեանց զօրակցութեամբ իրագործենք հայրենաշէն ու ազգաշէն մեր բոլոր ծրագրերն ու նուիրական նպատակները: Մեր Տիրոջ կողմից վկայուած եւ պատգամած սիրով ապրենք, որպէսզի իւրաքանչիւրիս յաջողութիւնը, ձեռքբերումը ծառայեն ընդհանուր բարօրութեանն ու առաջընթացին, յաղթանակ, փառք ու պատիւ դառնան մեր երկրի եւ ողջ ազգի համար, եւ մենք մնանք հաւատարիմ ու սեփական ժողովուրդ Աստուծոյ՝ արժանի Տիրոջ երկնային շնորհներին ու պարգեւներին:
Մեր Տիրոջ հրաշափառ Յարութեան աւետիսով ի Քրիստոս եղբայրական Մեր սէրն ու բարեմաղթանքներն ենք յղում Առաքելական մեր Սուրբ Եկեղեցու նուիրապետական աթոռների գահակալներին՝ ՆՍՕՏՏ Արամ Ա. Մեծի Տանն Կիլիկիոյ կաթողիկոսին, Երուսաղէմի Հայոց պատրիարք ամենապատիւ Տ. Նուրհան արքեպիսկոպոս Մանուկեանին, Կոստանդնուպոլսի Հայոց պատրիարք ամենապատիւ Տ. Մեսրոպ արքեպիսկոպոս Մութաֆեանին, քոյր եկեղեցիների շնորհազարդ հոգեւոր պետերին:
Հարուցեալ Տիրոջ շնորհների հայցով ողջունում ենք Հայաստանի Հանրապետութեան նախագահ տիար Սերժ Սարգսեանին, ողջոյն ենք յղում Լեռնային Ղարաբաղի Հանրապետութեան նախագահ տիար Բակօ Սահակեանին, հայոց պետական ողջ աւագանուն՝ մաղթելով արդիւնաշատ գործունէութիւն եւ մնայուն ձեռքբերումներ՝ յանուն մեր երկրի եւ մեր ժողովրդի լուսաւոր գալիքի:
Քիստոսի հրաշափառ Սուրբ Յարութեան աւետիսով Մեր օրհնութիւնն ենք բերում Հայաստանում հաւատարմագրուած դիւանագիտական առաքելութիւնների ղեկավարներին ու ներկայացուցիչներին՝ մաղթելով երկնային ամենայն բարիք եւ գործոց յաջողութիւն:
Հայրապետական Մեր սէրը եւ օրհնութիւնը՝ մեր Սուրբ Եկեղեցու ուխտեալ սպասաւորներին եւ հաւատաւոր Մեր զաւակներին ի սփիւռս աշխարհի:
Աղօթում ենք, որ հարուցեալ մեր Տիրոջ շնորհները հեղուեն մարդկանց հոգիներին, որպէսզի աշխարհում ամէնուր հաստատուեն եւ արգասաւորուեն խաղաղութիւնը, միմեանց հանդէպ սէրն ու արդարութիւնը: Թող Տէրը խաղաղ պահի մեր Հայրենիքը, մեր ժողովրդին՝ ի սփիւռս աշխարհի եւ օրհնի բոլոր ջանքերը՝ յանուն մեր կեանքի բարօրութեան, մեր հաւատքի պայծառութեան, որպէսզի ազգս հայոց այսօր եւ միշտ խնդութեամբ աւետի՝
Քրիստոս յարեաւ ի մեռելոց
Օրհնեալ է Յարութիւն
Քրիստոսի:
Սբ. Էջմիածին,
Մարտի 31, 2013 թ.