30 сакавіка падчас
св. Імшы Пасхальнай вігіліі чатыры асобы атрымаюць з рук Святога Айца сакрамэнт хросту.
Сярод іх 30-гадовыя расіянін і албанец, 23-гадовы італьянец, і 17-гадовы амерыканец
в’етнамскага паходжання. Пра гэта распавёў кс. Фэдэрыка Ламбардзі. Акрамя таго, падчас
літургіі Пасхальнай вігіліі неафіты атрымаюць сакрамэнт канфірмацыі і ўпершыню прыступяць
да св. Камуніі. Кіраўнік Залы Друку падзяліўся, што гэта літургія ў ватыканскай базыліцы
будзе карацейшай, чым звычайна. Гэта адбудзецца за кошт скарачэння колькасці чытанняў
са Старога Запавету. У папярэднія гады агульная працягласць гэтай “адной з самых насычаных
і прыгожых хрысціянскіх літургій” складала каля 3 гадзін, паінфармаваў святар. Кс.
Ламбардзі адзначыў, што Пасхальная вігілія з’яўляецца самай галоўнай літургічнай цэлебрацыяй
на працягу года. У Ватыкане яна пачнецца 30 сакавіка ў 20.30 па рымскім часе, як звычайна,
працэсіяй з запаленым пасхалам па базыліцы св. Пятра, якая паступова будзе напаўняцца
святлом. “Нажаль, заўсёды шмат святла ўтвараюць тыя, хто робіць фотаздымкі і якія
яшчэ не зразумелі, што не павінны гэтага рабіць, прынамсі раз у год”, - адзначыў кс.
Ламбардзі.
Кіраўнік Залы Друку нагадаў, што Велікодная св. Імша, пачнецца
на галоўнай ватыканскай плошчы раніцай 31 сакавіка ў 10.15. “Звычайна яна доўжыцца
паўтары гадзіны, і, такім чынам, пасля яе заканчэння Папа мае час для таго, каб падняцца
на лоджыю базылікі св. Пятра і ў 12.00 удзяліць благаслаўленне “Urbi et Orbi”, - адзначыў
ён і дадаў, што падчас Велікоднай св. Імшы Папа звычайна не прамаўляе гамілію, а звяртаецца
да вернікаў перад благаслаўленнем “Urbi et Orbi”. Адной з асаблівасцяў гэтай св. Імшы,
у адрозненні ад папярэдніх гадоў, будзе спеў Евангелля выключна па-лацінску; сёлета
яно не будзе гучаць па-грэцку. Паводле кс. Ламбардзі, прычынай такога рашэнне стала
не супадзенне ў гэтым годзе дат святкавання Пасхі па грыгарыянскім і юліянскім календарах.