Simboli i Dritës së Pashkëve në liturgjinë e Natës së Ngjalljes
Duke u Ngjallur, Jezusi i tërheq të gjithë në dritën e Tij dhe fiton mbi çdo formë
të errësirës, kështu pohon liturgjia e kësaj Nate të Shenjtë të Pashkëve. Liturgjia
e Fjalës Hyjnore, përshkon mrekullitë e krijimit, sipas Besëlidhjes së Vjetër e asaj
të Re të Biblës, duke na krijuar kontrastin e fuqishëm, të përjetshëm, ndërmjet dritës
e errësirës, e duke shpjeguar edhe ç’do të thotë ‘dritë’ e ç’do të thotë ‘errësirë’.
Prej këndej, shpjegohet edhe kuptimi i fjalëve “dritë” e “ndriçim”. Kështu, në
këtë Natë tejet të Shenjtë të pa gjumë të Pashkëve, Natë e krijimit të ri, Kisha e
paraqet misterin e dritës me një simbol shumë të veçantë e krejt të përvuajtur: me
një Qiri Pashke. Është Drita, që jeton në sajë të flijimit. Qiriu ndriçon, duke shkrirë
vetveten. Jep dritë, duke dhuruar vetveten. Deri në fund të fundit! Bëhet, kështu,
simbol mahnitës i misterit të Pashkës së Krishtit, i cili, duke dhuruar vetveten,
na jep dritën e madhe e të përjetshme Hyjnore. Qiriu i Pashkës na kujton edhe
se drita e tij është zjarr. Zjarri është forcë që i jep trajtë botës; fuqi që shndërron.
E, të mos harrojmë se, pa zjarr, nuk ka ngrohje. Edhe këtu bëhet i dukshëm misteri
i Krishtit. Jezu Krishti, Dritë, Zjarr, Flakë që djeg të keqen, duke e shndërruar,
kështu, botën, e të gjithë neve. “Kush është pranë meje, është pranë zjarrit”, tingëllon
fuqishëm në Natën e pagjumë të Pashkëve, kjo fjalë e Jezusit, që vjen mes nesh përmes
veprës së Origjenit. E ky zjarr është njëherësh edhe ngrohtësi; nuk është dritë e
akullt, por dritë në të cilën shkrihen në një ngrohtësia e mirësia e Zotit. Himni
i madh i ‘Exultet’, që diakoni e këndon në krye të Liturgjisë së Pashkës, na kujton
një aspekt tjetër. Na sjell në mendje se Qiriu, në radhë të parë, është fryt i
punës së bletëve. Kështu përfshin simbolikisht mbarë krijimin. Në Qiriun e Pashkës,
krijimi bëhet mbartës i dritës. Por sipas mendimit të Etërve të Kishës, bëhet
edhe simbol i vetë Kishës. Bashkëpunimi në bashkësinë e gjallë të besimtarëve në Kishë,
është gati-gati si bashkëpunim i bletëve rreth zgjoit. Ndërton bashkësinë e dritës.
E tek Qiriu, që ndriçon Natën e pagjumë të Pashkës ne mund të shikojmë edhe vetveten,
pjesëmarrjen tonë në bashkësinë e Kishës, që dëshiron ta ndriçojë mbarë botën me dritën
e Krishtit. Ta lusim, prandaj Zotin, në këtë orë të pagjumë, të na mbushë plot
me gëzimin e Dritës së Tij! E ta lusim që edhe ne të bëhemi mbartës të dritës së Krishtit
të Ngjallur; e që përmes Kishës, shkëlqimi i fytyrës së Krishtit, të hyjë në jetën
e botës!