Ortodoksët: Françesku, ‘dhuratë e Zotit’. Kishat e Reformuara: ‘gëzimi i Tij jep
shpresë’.
Është ende e fortë jehona e fjalëve të Papës Françesku drejtuar përfaqësuesve të Kishave
dhe të Bashkësive kishtare, të popullit hebraik dhe të feve të tjera. Papa ripohoi
dëshirën për të vijuar ecjen në udhën e dialogut, të përgjegjësisë ndaj tjetrit e
të nevojës për të punuar së bashku për pajtim e paqe. Ndërsa në fillim të takimit,
Patriku ekumenik ortodoks, Bartolomeu I, pati shprehur të njëjtën gatishmëri për të
ecur së bashku.
Ftuam, në mikrofonin tonë, Metropolitin Zervos Gennadios,
kryeipeshkëv ortodoks i Patriarkanës ekumenike të Italisë dhe të Maltës:
Përgjigje:
- Patriku Bartolomeu e nënvizoi shumë problemin e madh të unitetit, vuri
në dukje se Kishat duhet të ecin së bashku, të bashkëpunojnë për realizimin e vullnetit
të Zotit, domethënë, që të gjithë “të jenë një gjë e vetme”.
Pyetje:
- Foli edhe për të varfërit, të vegjëlit, ata që vuajnë, edhe për shkak të krizës
ekonomike të kohëve tona…
Përgjigje: - Nuk është hera e parë,
që Patriku flet për një Kishë të varfër, që kujton se duhet t’i ndihmojmë të vegjëlit
e se duhet të jemi pranë tyre, të gjithë së bashku, për t’u dhënë shpirt, dashuri,
paqe.
Pyetje: - Cila është përshtypja juaj dhe e përfaqësuesve të
tjerë ortodoksë, për Papën Françesku?
Përgjigje: - Besoj se
Papa Françesku duhet të jetë njeri i mrekullueshëm. Personalitet i dërguar nga Zoti.
Gëzimi i tij, përvuajtëria, thjeshtësia, gatishmëria, të gjitha këto gjëra, këto karizma,
na lanë mbresa të thella. Jemi të sigurtë se Zoti do ta ndihmojë e do ta bëjë të ecë
në të njëjtën udhë: në udhën e unitetit, të pajtimit, të vëllazërimit, të paqes e
të bashkimit të të krishterëve.
Pyetje: - Kur Papa shpjegoi pse
e zgjodhi emrin Françesk, kujtoi varfërinë, kujtoi Françeskun, si njeri i paqes, e
edhe si mbrojtës i krijimit. Kjo është një temë, që Kisha ortodokse dhe Bartolomeu
I e kanë shumë për zemër.
Përgjigje: - Po, e quajnë edhe
“patriku i gjelbër”. Ai është protagonist i madh i mbrojtjes së gjithësisë. Ka organizuar
shumë simpoziume, shumë takime, shumë kongrese ndërkombëtare mbi gjithçka krijoi Zoti.
Ka bërë edhe shumë udhëtime për të folur për Krijimin. E jo vetëm: u ka bërë thirrje
edhe kishave e konfesioneve të tjera të krishtera e, posaçërisht, Kishës katolike
romake që t’i pranojnë përgjegjësitë e tyre.
Pyetje: - Atëherë
mund të themi se ky theksim i Papës Françesku ju kënaq…
Përgjigje: -
Kjo është dhuratë e Zotit: emri Françesk, që zgjodhi, përmbledh gjithçka: thjeshtësi,
përvuajtëri, mirësi, paqe, qetësi, gatishmëri, flijim. Dashuria për Krijimin e krijesën
është diçka e mrekullueshme, vërtet. E pastaj jo vetëm emri, por edhe personaliteti
i Papës: shpresojmë se gjatë misionit të tij do të bëhen punë të nevojshme për njeriun,
për gjithësinë, për paqen, drejtësinë, të drejtat e njeriut. Unë e përshëndeta Papën:
më paraqiti Shenjtëria e Tij, Bartolomeu. Ishte diçka shumë e bukur; ai foli me mua
si atë, si vëlla. E kjo afërsi, kjo karizmë që ka kur komunikon me të afërmin, është
dhanti e madhe. Jam i kënaqur, shumë i kënaqur. E do të lutem gjithnjë për shëndetin
e tij e për misionin e tij të jashtëzakonshëm.
Po, si po e jetojnë
fillimin e papnisë së Papës Françesku, Kishat e Reformuara? Në mikrofonin tonë, të
dëgjojmë pastorin Setri Nyomi, sekretar i përgjithshëm i Bashkimit Botëror
të Kishave të Reformuara:
Përgjigje: - Edhe Kishat e Reformuara
marrin pjesë në gëzimin e këtij çasti fatlum të Kishës katolike romake për fillimin
e papnisë së Papës Françesku. Inkurajohemi sidomos, nga mënyra si iu paraqit Kishës,
që ka nevojë të bëhet gjithnjë më shumë kujdestare e dhuratave të Zotit, por edhe
nga përvuajtëria, me të cilën e nisi papninë, na jep shpresë, sepse pikërisht ai erdhi
të na prijë në këtë çast. Ne e pranojmë si prijës botëror, për të cilin duam të lutemi
e t’i qëndrojmë pranë.
Një përshtypje pozitive shpreh edhe Linda Bond,
gjenerale e Ushtrisë së Shpëtimit, pjesë e Kishës Kristiane botërore:
Përgjigja:
- I përkas Ushtrisë së Shpëtimit e përshtypja ime e parë është jashtëzakonisht
pozitive. Ai po thotë të gjitha gjërat, në të cilat beson Ushtria e Shpëtimit e që
i kemi shumë për zemër.
Pyetje: - Ç’impuls parashikoni se mund të
vijë edhe përmes punës së tij?
Përgjigje: - Më frymëzon shumë
përkushtimi i Papës për jetën e thjeshtë. Më frymëzon fakti se ai dëshiron të bëhet
interpretues i njerëzve të shtypur, e jam shumë, shumë e kënaqur që Papa dëshiron
të jetë pranë njerëzve. Besoj se në shekullin XXI për Kishën këto janë vlerat më të
rëndësishme, që duhet të ketë një prijës botëror.
Pyetje: - Mund
të nënvizoni një aspekt, një fjalë, që ju nxit më shumë?