Турэмны капелан: папе Францішку вядомы кантэкст і праблемы турмаў
Наведанне папам Францішкам
рымскай калоніі для непаўналетніх “Casal del Marmo” у Вялікі Чацвер 28 сакавіка мае
вялікае значэнне, бо дэманструе жаданне Касцёла служыць усім людзям, у тым ліку і
тым, хто апынуўшыся ў турме намагаецца верыць у Бога, лічыць генеральны інспектар
капеланаў італьянскіх турмаў кс. Вірджыліа Балдукі. У інтэрв’ю Ватыканскаму радыё
святар адзначыў, што паступак Папы – гэта не проста сведчанне прыязнасці, “але жэст,
які паказвае, што Святы Айцец клапоціцца аб справядлівасці не толькі ў гэтай краіне,
але і ва ўсім свеце”. Паводле капелана, клапаціцца пра справядлівасць, значыць паглядзець
у аблічча тых, хто жыве ў вялікіх цяжкасцях, асабліва ў турмах. “Я думаю, што папе
Францішку вядомы кантэкст і праблемы турмаў, нават больш складаныя, чым існуюць у
нас”, - лічыць святар. Па яго словах, рымская калонія для непаўналетніх “Casal del
Marmo” у апошні перыяд перажывала вялікія праблемы і Пантыфіку давядзецца сустрэцца
з маладымі людзьмі ў складанай сітуацыі. Таму, паводле капелана, Святы Айцец сваім
візітам хоча сказаць непаўналетнім: “Касцёл з вамі, і хоча святкаваць з вамі, тымі,
хто будуе Касцёл у гэтым месцы”.
Кс. Балдукі ўзгадаў словы папы Францішка,
які падчас інаўгурацыйнай св. Імшы сказаў, што сапраўдная ўлада – гэта служэнне, таму
Наступнік св. Пятра павінен прыняць з любоў’ю і пяшчотай тых, хто галодны, мае смагу,
пазбаўлены адзення, хворы або знаходзіцца ў турме.