Чатырохразовы ўладальнік
“Залатога мяча”, футбаліст Ліянэль Месі з “Барселоны”, па паходжанні аргентынец, спадзяецца
на хуткую сустрэчу з папам Францішкам. Ён ганарыцца тым, што новы Пантыфік паходзіць
з Аргентыны. Аб гэтым капітан аргентынскай зборнай заявіў на прэс-канферэнцыі 21 сакавіка
ў Буэнас-Айрэсе, паведамляе сёння “KNA”. “Для мяне было б вялікім задавальненнем сустрэцца
з ім”, - сказаў 25-гадовы аргентынец.
Новы Наступнік св. Пятра з’яўляецца вялікім
прыхільнікам футбола і ганаровым членам аргентынскага клуба першага дывізіёна “Сан-Ларэнса”.
Ён мае членскі нумар 88235. “Новы Папа з’яўляецца заўзятым прыхільнікам Сан-Ларэнса”,
- абвясціў клуб адразу пасля канклава на сваім сайце, а яго прэзідэнт неадкладна накіраваў
віншавальны ліст папе Францішку. На інтэрнэт-старонцы клуба ўзгадваецца, што кардынал
Берголія 24 мая 2011 г. правёў вялікую св. Імшу на хатнім стадыёне “Сан-Ларэнса”,
падчас якой два футбалісты моладзевай каманды атрымалі з яго рук сакрамэнт канфірмацыі.