Папа Францішак: Касцёл усведамляе важнасць сяброўства паміж рознымі рэлігіямі
20 сакавіка папа Францішак
сустрэўся з дэлегатамі хрысціянскіх Цэркваў і прадстаўнікамі іншых рэлігій і веравызнанняў,
якія прыбылі ў Ватыкан на яго інаўгурацыю. Сустрэча прайшла ў Клементыйскай зале Апостальскага
палаца. “Перш за ўсё, сардэчна дзякую майму брату Андрэю”, - сказаў Папа, звяртаючыся
да Патрыярха Канстантынопальскага Барталамея І, падкрэліўшы, што іерарх з’ўляецца
наступнікам брата св. Пятра – апостала Андрэя. Францішак нагадаў, што пачынае сваё
апостальскае служэнне ў год, які яго “шаноўны папярэднік Бэнэдыкт XVI” вырашыў асаблівым
чынам прысвяціць веры, “прапануючы свайго роду пілігрымку да таго, што для кожнага
хрысціяніна з’яўляецца самым істотным: асабістых і перамяняючых адносін з Езусам Хрыстом”.
Пантыфік адзначыў, што Год веры супадае з 50-годдзем ІІ Ватыканскага Сабора, “скарб
якога ўсцяж каштоўны для людзей нашага часу” і нагадаў, што, адкрываючы Сабор, папа
Ян ХХІІІ падкрэсліваў важнасць імкнення да “вялікай таямніцы адзінства, аб якім Езус
Хрыстус горача прасіў Айца Нябеснага напярэдадні сваёй мукі”.
Папа заклікаў
упоўні жыць дарам атрыманай веры і даваць свабоднае, радаснае і мужнае сведчанне аб
ёй. “Гэта будзе нашым найлепшым служэннем на карысць адзінства паміж хрысціянамі,
служэннем надзеі для свету, які ўсё яшчэ пазначаны падзеламі, кантрастамі і суперніцтвам.
Чым больш мы будзем вернымі Яго волі ў думках, словах і справах, тым больш будзем
па сапраўднаму рухацца ў кірунку адзінства”, - адзначыў Святы Айцец.
“Са свайго
боку” папа Францішак запэўніў прадстаўнікоў канфесій і рэлігій, што ўслед за сваімі
папярэднікамі будзе працягваць шлях экуменічнага дыялогу і папрасіў прысутных аб малітве,
“каб мог быць пастырам паводле сэрца Хрыстовага”.
Святы Айцец звярнуўся да
прадстаўнікоў яўрэйскай супольнасці і падкрэсліў, што “Каталіцкі Касцёл прызнае, што
карані яго веры і яго абранасць, знаходзяцца ўжо, паводле Божай таямніцы збаўлення,
у Патрыярхах, Майсеі, прароках”. Вітаючы прадстаўнікоў іншых рэлігій, асаблівую ўвагу
Папа звярнуў на мусульман, якія таксама “вызнаюць адзінага, жывога і міласэрнага Бога”.
“Каталіцкі Касцёл усведамляе важнасць спрыяння сяброўству і павазе паміж мужчынамі
і жанчынамі розных рэлігійных традыцый”, – паўтарыў двойчы Святы Айцец. “Ён таксама
ўсведамляе адказнасць, якую мы ўсе нясём за наш свет, за ўсё стварэнне, якое павінны
любіць і бараніць. І мы можам зрабіць шмат для дабра тых, хто бедны, слабы і пакутуе,
для спрыяння справядлівасці, прымірэнню і будаванню міра”, - сказаў папа Францішак.
Ён
вылучыў галоўны прыярытэт для прадстаўнікоў рэлігій: “Перш за ўсё, мы павінны заўсёды
падтрымліваць жывой прагу абсалюта ў свеце, не дазваляючы, каб дамінаваў аднабаковы
погляд на чалавечую асобу, паводле якога, чалавек вымяраецца тым, што вырабляе і тым,
што спажывае: гэта адна з самых небяспечных пастак нашага часу”, - звярнуў увагу Святы
Айцец.
Перад сустрэчай у Клементыйскай зале адбыліся тры прыватныя аудыенцыі,
на якіх Святы Айцец прыняў Прэзідэнта Бразіліі Дзілму Русэф, Патрыярха Канстантынопальскага
Барталамея І і кіраўніка Аддзела знешніх царкоўных сувязяў Маскоўскага Патрыярхата
Мітрапаліта Іларыёна.