Buenos Ajres. Të krishterë, hebrenj e myslimanë, në kor të njëzëshëm: “Papa Françesku,
njeri i bashkimit e i dialogut”.
“Njeri i bashkimit, i gatshëm të dialogojë, i aftë të dëgjojë, plot respekt për tjetrin”:
është kor i njëzëshëm ky, që dëgjohet në Buenos Ajres, njofton i dërguari i agjencisë
Sir. Sipas tij, përfaqësuesit e Kishave të krishtera, hebrenjtë e myslimanët e përshkruajnë
kështu kardinalin Horhe Mario Bergolio, që u zgjodh Papë. Rabinja Silvina Shemen,
anëtare e bashkësisë historike të hebrenjve në Buenos Ajres, pohon se portat e Katedrales
kanë qenë gjithnjë të hapura për kremtime ndërkonfesionale e se, më se një herë, pati
privilegjin të lejohet për të përdorur amvonën, duke dhënë që aty mesazhin e saj.
“Ishte i njëjtë me atë, që theksonte kardinali në homelitë e tij”, pohon. Do t’i prijë
dialogut, vijon, me zemër të hapur, me reciprocitet, me aftësi për të heshtur, kur
flet tjetri, me fisnikërinë e njeriut, që di të dëgjojë. Uroj të mos e humbasë kurrë
shkëlqimin lartësia e përvuajtërisë së tij dhe madhështia e thjeshtësisë së tij. Shumë
të vlerësuara nga liderët argjentinas të Kishave të krishtera, fjalët e para shqiptuar
prej Papës Bergolio, në përshëndetjen drejtuar shtegtarëve të Romës nga Lozha e Bekimeve.
“Kardinali Bergolio, pohon David Kalvo, bari evangjelik Luteran, ka pasur gjithnjë
marrëdhënie shumë të përzemërta me ne; pranë tij e ndjenim vetën të pranuar e të mikpritur;
shprehte gjithnjë interesim të veçantë për bashkimin e të krishterëve dhe respekt
të thellë për traditat e ndryshme të krishtera. Jam i sigurtë se Papa Françesku do
ta shpejtojë, me zell të ri, ecjen e ngadalshme, por të pandalshme, në udhën drejt
bashkimit”. Bekime për Papën e ri arrijnë edhe nga myslimanët e Buenos Ajres.
Në një mesazh përgëzimi, drejtuar Papës Bergolio nga Qendra Islamike e Republikës
së Argjentinës (Cira), shkruhet kështu: “Gjatë punës së tij, si kardinal, Bergolio
thelloi dialogun ndërfetar dhe respektin, duke krijuar, pa u lodhur kurrë, hapësira
komunikimi e pune të përbashkët për bashkëjetesën e harmonishme të feve të Zbulesës.
Për këtë arsye i lartojmë lutje Zotit të Dhimbshëm e të Mëshirshëm, që kjo punë të
vijojë të fuqizohet, duke i siguruar njerëzimit më shumë mirëkuptim, më shumë respekt
e, sidomos, më shumë paqe”. Marrëdhëniet e ish-kryeipeshkvit Bergolio me Qendrën
islamike ishin shumë të ngushta: kardinali i asokohshëm pati shkuar për vizitë në
Qendrën islamike tri herë; herën e fundit, më 29 qeshor 2010. “Sa herë hynte në lidhje
me myslimanët, në Argjentinë, tregon Omar Abu Arab, drejtues i bashkësisë myslimane,
e bënte këtë plot respekt, dashuri e sjellje të një njeriu, që e ndjen veten ndërmjet
të të barabartëve”.