Шэсць пурпуратаў ад
імя ўсёй Калегіі кардыналаў публічна паабяцалі паслухмянасць новаабранаму Пантыфіку.
Гэта адбылося непасрэдна перад пачаткам інаўгурацыйнай св. Імшы на плошчы св. Пятра.
Кардыналаў-біскупаў прадстаўлялі кардынал Джавані Батыста Рэ, прэфект Кангрэгацыі
па справах Біскупаў на пенсіі і кардынал Дзяржсакратар Тарчызіо Бэртонэ. Ад імя кардыналаў-прэсбітэраў
папе Францішку паабяцалі паслухмянасць нямецкі кардынал Ёахім Майснэр, арцыбіскуп
Кёльна, і філіпінскі кардынал Рыкарда Відаль, арцыбіскуп Сэбу на пенсіі. Самую вялікую
групу пурпуратаў – кардыналаў-дыяканаў – падчас абяцання паслухмянасці прадставілі
кардынал Рэната Рафаэле Марціна, старшыня Папскіх радаў “Iustitia et Pax” і пастырства
эмігрантаў і падарожнікаў на пенсіі, а таксама кардынал Франчэска Маркізана, арцыпрэсбітэр
Ватыканскай базылікі на пенсіі і старшыня Бюро працы Святога Пасаду на пенсіі.
Трэба
нагадаць, што Бэнэдыкт ХVI перад сваім сыходам зацвердзіў некаторыя змены ў “Ordo
rituum pro ministerii Petrini initio Romae Episcopi”, - рытуале, які змяшчае парадак
цэлебрацый на пачатак служэння новаабраных Пантыфікаў. Паводле іх, падчас інаўгурацыі
новага Біскупа Рыма ўсе тыповыя для гэтых абрадаў жэсты, такія як: уручэнне папскага
палія і Пярсцёнка Рыбака, абяцанне паслухмянасці кардыналамі, здзяйсняюцца па-за самой
цэлебрацыяй св. Імшы.