Mesha e fillimit të shërbimit pjetrin të Papës Françesku: “Mos kini frikë nga mirësia
e zemërbutësia”
Të vegjlit, të moshuarit, të brishtët, të mënjanuarit, në qendër të homelisë së Papës
Françesku, në meshën e fillimit të papnisë së tij kremtuar sot paradite në Sheshin
e Shën Pjetrit në Vatikan. “Pushteti i vërtetë është shërbim”, “ruajeni e mbrojeni
gjithësinë e njeriun”, “shërbimi im është për të varfërit, për të huajt, për të burgosurit,
për të sëmurët”, “urrejtja, zilia, mëndjemadhësia, e ndyejnë jetën”, “kur qielli mbulohet
me re, na duhet shpresa”: janë vetëm disa nga frazat, që shkaktuan duartrokitje e
brohoritje të stuhishme në sheshin e Shën Pjetrit në Vatikan, mbushur plot sa s’mbante
më, në këtë ditë historike e të mrekullueshme me diell, në Solemnitetin e Shën Jozefit.
U pëlqen besimtarëve, por jo vetëm atyre, ky Papë që mban kokën ulur gjatë gjithë
ritit të pendesës, që zbret nga makina në mesin e turmës, që përqafon një paraplegjik,
që kremton një Meshë, ku Psalmi këndohet nga një fëmijë e ku lutjet thuhen edhe në
gjuhën ruse, arabe e kineze e ku një shesh i tërë intonon “Besojmën”. “Na duhej një
Papë si ky”, thotë një 80-vjeçar në sheshin e Shën Pjetrit, të cilit i kanë kaluar
para syve disa Papë. Entuziazëm i paparë i besimtarëve, që kur Papa Françesku
doli me xhipin e bardhë e jo me papamobilin e zakonshëm, për të përshkuar rreth e
përqark sheshin e Vatikanit mbushur plot me 200 mijë besimtarë. Në një çast, Ati i
Shenjtë Françesku e ndali makinën, për të zbritur në mesin e njerëzve e për të përqafuar
Çezare Çikonin, ardhur në Vatikan në një shtrat të veçantë, paraplegjik që kur ishte
8 muajsh, ndër të sëmurët e shoqëruar nga veprimtarët e UNITALS-it(organizata italiane
që transporton të sëmurët në ceremonitë fetare). Pastaj kaloi në mesin e turmës në
festë, që valëviste flamujt e gjithë botës, ndër të cilët spikasnin ngjyrat e Argjentinës,
por edhe ngjyra kuq e zi e flamurit shqiptar. E përsëri një ndalesë. Papa Françesku
zgjati duart për të puthur disa fëmijë. Mëse 130, delegacionet nga të katër anët
e planetit: 31 krerë shtetesh, 6 mbretër, 3 princë trashëgimtarë, 11 krerë qeverish.
33, delegacionet e Kishave të krishtera jo katolike, ndër të cilët ai i kryesuar nga
Patriku Ekumenik i Kostandinopojës, Bartolomeu I. Të pranishëm, edhe hebrenj, myslimanë,
budistë, sikh e jainistë. 180, bashkëkremtuesit. Papa Françesku zbriti në procesion,
së bashku me patrikët e Kishave Lindore në Varrin e Shën Pjetrit brenda Bazilikës,
para të cilit u ndal në lutje. Ndërkohë, dy diakonë morën palion, unazën
e Peshkatarit dhe Evangjeliarin (Librin e leximit të Ungjillit).
Procesioni u ngjit në nivelin e Bazilikës, duke kënduar “Laudes Regiae”, pra, “Lavdi
Mbretit”: Mbreti është Krishti. Në këtë këngë-litani në nder të Krishtit, u kërkohet
të gjithë shenjtorëve, ndër të cilët edhe Papëve shenjtorë të luten për ne. Procesioni
hyn në tremen e Bazilikës së Shën Pjetrit. Papa Françesku bën shenjën e Kryqit në
fillim të Meshës. Pastaj kardinali protodiakon Zhan-Lui Toran vendos simbolin e Palios
mbi supet e Atit të Shenjtë. Palio, prej leshi të bardhë qengji, është simboli
i ipeshkvit, që imiton Krishtin, Bariun e Mirë dhe shenjë e Qengjit të kryqëzuar për
shëlbimin e njerëzimit. Më pas, kardinali dekan, Anxhelo Sodano i jep Papës Françesku,
Unazën e Peshkatarit, shenjë e vulë e ipeshkvit. Unaza e Peshkatarit përmban një
imazh të Shën Pjetrit (peshkatarit të zgjedhur nga Jezusi për t’u bërë peshkatar njerëzish)
me çelësat e Kishës në dorë, që simbolizojnë detyrën për t’i përforcuar vëllezërit
në fe, të cilën Krishti ia besoi Pjetrit e nëpërmjet tij, krejt Kishës. Unaza e Papa
Françeskut nuk është prej ari, por prej argjendi të praruar. Një përfaqësi e kardinajve,
gjashtë vetë, betohen para Papës për t’iu “bindur”, në një gjest, i cili përsëritet
sa herë që zgjidhet një Papë i ri. Leximet biblike të Meshës janë ato të festës së
Shën Jozefit e pastaj homelia e Papës Françesku, e ndërprerë disa herë nga duartrokitjet
e brohoritjet.