Mesha e fillimit të papnisë së Jorge Mario Bergoglio ndiqet nga mediat e gjithë botës,
përveç Kinës
Nga Rusia në Indi, duke kaluar nëpër Amerikën e Jugut, faqet e internetit të të gjithë
botës flasin për Papën Françesku e për meshën e sotme të fillimit të papnisë. Nëse
gazeta argjentinase “La Nacion” hapet me një fotografi të presidentes, Kristina Fernandez
de Kirchner, e cila u mallëngjye kur përshëndeste Atin e Shenjtë, venezuelania “El
Universal” titullon: “Françesku fillon papninë e tij”. Gazeta franceze “Le Figaro”
vlerëson “thjeshtësinë” me të cilën Papa kremtoi ceremoninë në Vatikan: “Papa thotë
një homeli shumë të thjeshtë”. Mesha ndiqet drejtpërdrejt edhe në faqen e internetit
të “Times of Malta”, ndërsa spanjollja “El Mundo” i kushton ngjarjes, fotografi, video
dhe reflektime. Por, mesha e sotme nuk komentohet vetëm nga mediat e vendeve
me shumicë katolike. CNN titullon “Një përurim ‘i thjeshtë’ shenjon fillimin e papnisë
së Françeskut” e faqja e internetit e BBC-së e ndjek ngjarjen me lidhje video të drejtpërdrejtë.
Gazeta popullore gjermane “Bild” vë në dukje një element të diskutueshëm. Paraqet
fotografinë e përshëndetjes së Papës me presidentin e Zimbabves, Robert Mugabe, i
cili, sipas sanksioneve evropiane, nuk mund të shkelë në vendet e Bashkimit Evropian,
të cilat janë të detyruara gjithsesi, ta lenë të kalojë për të shkuar në një tokë
neutrale si Vatikani, apo territori i selisë së OKB-së. Lajmi i kremtimit të
sotëm është edhe në faqen e parë të internetit të rrjetit televiziv arab “Al Jazeera”
në gjuhën angleze, por edhe në atë të gazetës “Times of India”. Mungon në këtë apel,
faqja e internetit Cctv, e televizionit shtetëror kinez. Edhe në lajmet e fundit të
faqes ruse të gazetës “Pravda” flitet për Jorge Mario Bergoglio-n, por vihet në dukje
Unaza e Peshkatarit, që i dha kardinali dekan, Anxhelo Sodano. “Papa i ri – është
titulli i Pravdës, që i referohet faktit se unaza është prej argjendi e jo prej ari
– është i kursyer me simbolet e autoritetit papnor”.