Сястра Пантыфіка: яго клопат аб ахвярах дыктатуры пацверджаны
Родная сястра Папы
Францішка, Марыя Берголья падзялілася некаторымі разважаннямі аб момантах з жыцця
свайго брата. У інтэрв’ю італьянскай “La Stampa”, яна расказала, што іх сям’я была
вымушана пакінуць Італію ў часы фашысцкай дыктатуры. “Я памятаю, што мой айцец заўсёды
паўтараў, што прыход фашыстаў прымусіў яго ўехаць”, - сказала яна. Гаворачы пра абвінавачванні
ў адрас Хорхе Берголья, якія тычацца нібыта лаяльнасці да аргентынскай хунты, сястра
Пантыфіка адзначыла: “Гэта б азначала здрадзіць таму, чаму нас вучыў айцец сваім складаным
жыццёвым выбарам”. Марыя Берголья выказала меркаванне, што абвінавачванні былі прыдуманы
левымі сіламі. “Гэта як цвікі, якія з’яўляюцца часткай шляху, і Бог іх вырве”, - сказала
яна.
Сястра Папы падкрэсліла, што ў часы дыктатуры ён дапамагаў тым, хто цярпеў
ад пераследу. “Гэта былі цёмныя часы і была неабходна разважлівасць, але яго клопат
аб ахвярах пацверджаны”, - адзначыла яна.
Марыя Берголья таксама падзялілася,
што адгукнулася на заклік Святога Айца да суайчыннікаў – не прыязджаць на яго інаўгурацыйную
св. Імшу ў Рым, а грошы прызначаныя на падарожжа ў Вечны горад выкарыстаць на карысць
бедных. “Мой брат папрасіў мяне сэканоміць грошы і выкарыстаць іх на справы дабрачыннасці.
Зраблю як ён кажа”, - падзялілася Марыя Берголья.