Liturgjia e Fjalës së Zotit e dielës së 5-të e Krezhmëve
Dëgjues të nderuar, ja përsëri në takimin tonë javor me Fjalën e Zotit të liturgjisë
hyjnore të së dielës, kësaj herët do të dëgjojmë dhe meditojmë së bashku leximet biblike
të dielës së 5-të e të fundit të kohës së Kreshmëve të ciklit të tretë, sipas kalendarit
kishtar. Edhe këtë të diele vijon tema e mëshirës dhe e dashurisë së pakufishme
të Zotit ndaj çdo njeriu, në mënyrë të veçantë ndaj mëkatarit. “Unë nuk e dua vdekjen
e mëkatarit – thotë Zoti – po dua që ai të kthehet e të jetojë”. Tema e mëshirës hyjnore
ishte argumenti qendror edhe i të gjitha të dielave të mëparshme të kësaj kohe të
krezhmëve. Në lutjen e hyrjes së Meshës të kësaj së diele, mes tjerash themi: “Na
ndihmo, po të lutemi o Zot, Ati ynë i Mëshirshëm, të mund të jetojmë dhe të veprojmë
përherë me atë dashuri, që shtyri Birin tënd, Jezu Krishtin ta japë jetën për ne”.
Dhurimi i jetës, , mundësia për të qenë “njerëz të ri”, rasti për jetuar një jetë
të re, të rilindur në përmasën shpirtërore e njerëzore, pse të dashur, pse të falur,
pse të përqafuar nga Përdëllimi i Hyjit Atë, kjo mund të themi se është porosia e
leximeve biblike të kësaj së diele. E Jezusi, në pjesën e Ungjillit, na tregon konkretisht
si e ushtron Zoti këtë mëshirë të Tij Hyjnore e të pakufishme ndaj njeriut: jo me
dënim por me falje, e ndërsa fal urdhëron të mos mëkatënohet më: “As unë nuk po të
dënoj – i tha Jezusi gruas mëkatare të akuzuar – Shko, por pas tashit mos mëkato më!”
(Ungjilli). Ai, pra, që pendohet Zoti e fal. Ai nuk i kujton më gjërat e kaluara,
e madje përkundrazi krijon gjëra të reja (Leximi I) Dëshira për të ndryshuar e
përmirësuar jetën, për të qenë më të mirë, …banon në zemër të shumë njerëzve. Ndryshimi
i jetës, ndryshimi i sjelljeve të zakonshme është përvojë njerëzore e aspiratë e përhapur
ndër shumë persona. E mirë pra, liturgjia e Fjalës së Zotit e kësaj së diele na transmeton
këtë mesazh: risia e jetës është e mundur, mundësia e fillimit të një jete vërtetë
të re është pikërisht dhurata që Krishti na ofron. Kështu liturgjia e Fjalës Hyjnore
të kësaj së diele na rrëfen për takimin e njeriut me Jezusin, i cili nuk ngrihet si
gjykatës për të na dënuar për gabimet e për mëkatet tona, por na depërton në thellësi
të rrënjëve të shpirtit tonë e ndihmon për ta ndryshuar e shëruar ekzistencën tonë
njerëzore nga e keqja, mëkati e madje edhe vdekja e përjetshme. Është forca që vjen
prej Tij e cila mund t’i shërojë plagët tona e në ne të nxisë atë përtëritje e atë
ndryshim pozitiv që me forcat tona njerëzore nuk do të arrinim ta bënim. Kjo forcë
e ka një emër: është falja!. Është energjia për të cilën njerëzimi ynë ka nevojë për
të mos u bërë viktimë e dhunës dhe e fuqive të pushtetshme që mund të na dëmtojnë
e madje edhe shkatërrojnë. Kështu, në udhëtimin tonë shpirtëror drejt Pashkëve,
Ungjilli i kësaj së diele na paraqet takimin e Jezusit me një grua mëkatare, që shkeli
kurorën e besnikërinë bashkëshortore e për këtë akuzohet prej skribëve e farizenjëve,
që kërkojnë dënimin e saj me vdekje. Gruan fatkeqe e fatzezë zënë në pabesì bashkëshortore,
të akuzuar e paraqitur para Mësuesit për t’u dënuar me vdekje, sipas normave e ligjeve
në fuqi, Jezusi e ndihmon, ia ngjet dorën për t’a nxjerr nga poshtërimi i mëkatit
e për t’i dhënë mundësinë e rilindjes në jetën e re. Leximi i parë nga Izaia profet
flet për Zotin që di të krijoi gjëra të reja, di të ngjizë, të formoj njerëzimin e
ri: për të treguar këtë energji përtëritëse e rilindëse të Hyjit, Izaia profet përdor
imazhin e një udhëtimi përmes shkretëtirës së lulëzuar, sepse e lagur, e mbrujtur
nga uji i begatë. Hebrenjve të sprovuar nga mërgimi në Babiloni, Izaia profet u
kujton çlirimin nga Egjipti e premton, nga ana e Hyjit, një ndërhyrje të re çlirimtare. Edhe
leximi dytë nga letra e shën Palit drejtuar Filipianëve, flet për takimin shndërrues
me Jezusin: një takim të cilin Pali e përshkuar duke aluduar në përvojën e tij personale
që pati në udhën e Damaskut. Pali pra përdor fjalorin sportiv për të treguar impenjimin
e tij për Ungjill. Jeta e Apostullit është porsi vrapimi drejt një caku: drejt çmimit
të cilin Zoti na fton ta marrin atje lartë në Qiell, në Jezu Krishtin. Ungjill
i kësaj së diele na ofron një skenë vërtetë të lartë kristologjike: me qëndrimin dhe
sjelljen e tij, Jezusi dëftohet e paraqitet si bartës i gjyqit përfundimtar të Hyjit,
është fjala për gjyqin e mëshirës e të shpëtimit, që pjesa ungjillore e kësaj së diele
na rrëfen në konkretizimin e refuzimit të dënimit, siç përkundrazi donin njerëzit,
të një gruaje të zënë në mëkat dhe në dhënien e mundësisë për të mos mëkatuar më e
për të jetuar një jetë të re. Në qendër të episodit është mëkati i gruas, e poshtëruar
dhe e përbuzur. Jezusi nuk e dënon mëkataren, por e fal. Pse në falje është tërë aftësia
e fuqia e dashurisë, që na dhuron një jetë të re e na shpëton.
Liturgjia e Fjalës së Zotit Leximi i parë Is 43, 16-21 Populli
hebraik ka qenë internuar në Babiloni. Profeti ka për detyrë t’i kujtojë popullit
mirësinë dhe besnikërinë e Hyjit, i cili ashtu siç kishte çliruar hebrenjtë nga skllavëria
e Egjiptit, kështu tani do të çlirojë popullin e tij dhe do ta dërgojë në tokën e
vet. Hyji vetë do të hapë rrugën në shkretëtirën e historisë dhe do të japë shpëtimin.
Ai do të bëhet, në Jezusin, “udha” për çdo njeri.
Lexim
prej Librit të Isaisë profet Kështu thotë Zoti që rrugë hapi nëpër det e shteg
kalimi në mesin ujërave të tmerrshme; që bëri të dalin karroca e kuaj, ushtri e heronj
së bashku; ata ranë vdekur, kurrë më s’do të ngritën, u fikën si fitili, u shqimën.
“Mos i kujtoni ngjarjet e shkuara, mos mendoni për çka ka kaluar, ja, po bëj një
gjë të re: tani po lind! A s’po e shihni? Ja, po hap udhën në shkretëtirë, e shtigje
në vend të shkretë. Egërsirat do të më japin lavdi çakajtë edhe strucët, se u dhurova
ujë në shkretëtirë, lumenj në vend të shkretë, që t’i japë ujë popullit, të zgjedhurit
tim, popullit që e trajtova për vete dhe që mua do të më japë lavdi”. Fjala
e Zotit. Falënderojmë Hyjin! Psalmi 126 Punë të mëdha bëri Zoti
për ne Kur Zoti i ktheu robërit e Sionit, na dukej si të ishim në ëndërr. Atëherë
goja na u mbush me gaz e gjuha jonë ia thoshte këngës së gëzimit!
Asohere
thuhej ndër paganë: “Zoti bëri për ta punë të mëdha!” Vërtet Zoti bëri për ne
mrekulli e zemrat na u mbushën me gëzim!
Ktheji, o Zot, robërit tanë porsi
përrenjtë e Negebit! Ata që mbjellin me lot, deh, le të korrin me gëzim!
Në
të shkuar ecnin e qanin duke mbartur farën për ta mbjellë, kurse në kthim
do të vijnë plot gëzim duke mbartur dorëzat e veta Fil 3,8-14 Pali,
pas takimit me Krishtin, ka ndryshuar jetën e tij. Nëse më përpara ndiqte me pasion
ligjin dhe burgoste dishepujt e Krishtit, tani ndjek me të njëjtën dashuri dhe me
të njëjtin vrull Krishtin. Ka fshirë gjithçka para syve dhe nuk sheh asgjë tjetër
përveç Krishtit. Lexim prej Letrës së shën Palit apostull drejtuar Filipianëve Vëllezër,
unë çmoj gjithçka si dëm në krahasim me më të madhen të mirë: me njohjen e Jezu Krishtit,
Zotit tim. Për të kam bjerrë çdo gjë dhe të gjitha i çmoj si llom, me qëllim që të
fitoj Krishtin dhe të gjendem në Të – jo me drejtësinë time – me atë që vjen nga Ligji,
por me atë që vjen nga feja në Krishtin, me drejtësinë që vjen nga Hyji, e themeluar
në fe – që ta njoh atë dhe fuqinë e ngjalljes së tij me pjesëmarrjen në vuajtjet e
tija, që të bëhem i ngjashëm me Të në vdekjen e tij, që në ndonjë mënyrë të mund t’ia
arrij ngjalljes së të vdekurve. Jo sikurse t’ia kisha arritur, as sikurse të isha
bërë i përsosur, por vrapoj që, në ndonjë mënyrë, të mund ta zë, sepse edhe vetë kam
qenë zënë prej Krishtit Jezus. Vëllezër, unë nuk mendoj se ia kam arritur; di vetëm
kaq: harroj çka kam lënë pas dhe zgjatem drejt të së ardhmes, sulem drejt qëllimit,
drejt shpërblimit të thirrjes qiellore të Hyjit në Krishtin Jezus. Fjala e Zotit.
Falënderojmë Hyjin!
Lavdi ty, o Krisht, Mbret i lavdisë së amshuar! Nuk
e dua vdekjen e mëkatarit, thotë Zoti, po që të kthehet e të jetojë. Lavdi ty,
o Krisht, Mbret i lavdisë së amshuar!
Ungjilli Gjn 8, 1-11 Jezusi
nuk pohon se mëkati i gruas kurorëshkelëse është një fakt pak i rëndësishëm, në të
kundërt i deklaron asaj: tani e tutje mos mëkato më. Në sytë e Jezusit mëkati është
pabesnikëri ndaj dashurisë së Hyjit, por nuk do t’i burgosë njerëzit në mëkatin e
tyre, beson në mundësinë e kthimit për secilin prej nesh. Na thërret në një dashuri
të ripërtërirë, përtej egoizmit tonë. Leximi i Ungjillit shenjt sipas Gjonit Në
atë kohë, Jezusi shkoi në Malin e Ullinjve. Në mëngjes erdhi prapë në Tempull. Mbarë
populli shkonte tek ai. Ai u ul e po i mësonte. Atëherë skribët e farisenjtë ia sollën
para një grua të zënë në kurorëshkelje. E vunë në mes dhe i thanë: “Mësues, kjo grua
u zu ndërsa po bënte mëkatin e kurorëshkeljes. Në Ligj Moisiu na urdhëroi të këtillat
të vriten me gurë. Po ti çka thua?” Folën kështu për ta vënë në provë që të kishin
për çka ta padisnin. Jezusi u përkul e filloi të shkruajë me gisht në dhe. E, pasi
ata vijonin ta pyesnin, ai u drejtua e tha: “Kush është prej jush pa mëkat, le ta
qesë i pari gurin në të!” Përsëri u përkul e vazhdoi të shkruajë me gisht në dhe.
Ata, kur e dëgjuan përgjigjen, nisën një nga një të largohen duke filluar prej më
të vjetërve. Jezusi mbeti vetëm – dhe gruaja që po qëndronte në këmbë në midis. Jezusi
u drejtua dhe i tha: “Grua, ku janë ata? Askush nuk të dënoi?” “Askush, Zotëri!” –
përgjigj ajo. “As unë nuk po të dënoj – i tha Jezusi – Shko, por mbas tashit mos mëkato
më!” Fjala e Zotit. Lavdi të qoftë ty, o Krisht! Më shumë mbi liturgjinë
e Fjalës së Zotit të kësaj së diele e komentin mund të dëgjoni këtu.....