Atë Lombardi: Papa është i qetë; fushata kundër tij është shpifëse, e tipit antiklerikal
Ta shoqërojmë papninë e re, në hapat e para, me gëzim e entuziazëm. Këtë pohoi sot
atë Federiko Lombardi në takimin me gazetarët në Media Center, në Vatikan. Drejtori
i Sallës vatikanase të Shtypit saktësoi edhe se nuk ka ekzistuar kurrë ndonjë lidhje
ndërmjet atë Bergoglios dhe diktaturës argjentinase, siç thuhet, përmes disa akuzave
pa kurrfarë baze. Një Papë i përvuajtur, i thjeshtë, i vetvetishëm, i afërt me
njerëzit, që është krejt mirë, i vetëdijshëm e i qetë. Është ky portreti i Papës
së ri, që u paraqiti atë Lombardi gazetarëve, duke hapur edhe një portë të re, për
t’u treguar si po i kalon Papa Françesku këto ditë të para të papnisë, në Vatikan: “Në
darkë ose në drekë, zakonisht, bashkohet me kardinajtë që kanë arritur… atëherë shkon
e ulet në një nga vendet e lira; nuk ka një vend të veçantë për të e shkon ku ka karrige
të lira, në mënyrë krejt të natyrshme. Sot e kremtoi Meshën në orën 7.00, në Kapelën
e Shën Martës, e shumë kardinaj deshën të bashkëkremtojnë me të. Prej këndej, Mesha
u bashkëkremtua në Kapelë sot në mëngjes, në orën 7.00 e Papa bëri edhe një predk
të shkurtër, kushtuar Ungjillit dhe leximeve të Meshës së paradites”. Atë
Lombardi kujtoi, me emocion të thellë se, dje paradite, e shoqëroi Atin e Shenjtë,
kur shkoi në Shtëpinë e klerit, pas lutjes në Bazilikën e Shën Marisë së Madhe: “Kalimi
i tij dje ishte vërtetë shumë prekës, sepse shihej që i njihte personalisht, e mirë,
të gjithë punonjësit, i pyeste për bijën a gruan… Të gjithë qanin nga emocioni. Prej
këndej, përvoja e një njeriu të afërt me njerëzit, me nëpunësit, me punëtorët e shtëpive
të klerit”. Konfirmoi, më pas, lajmin e përhapur nga shtypi, sipas të cilit
Papa, mbrëmjen e zgjedhjes, i telefonoi nuncit në Argjentinë, imzot Emil Paul Tscherring,
duke u kërkuar, përmes tij, të gjithë atyre që kanë shprehur dëshirën të vijnë për
Meshën e fillimit të papnisë, në Romë, t’ua dhurojnë nevojtarëve shumat e mbledhura
për shtegtimin. Drejtori i Sallës vatikanase të Shtypit foli edhe për një klimë gëzimi
të madh e përtëritjeje shpirtërore: “Një gjë tjetër, që më tha nunci sot
paradite, ishte se në Buenos Ajres e në Argjentinë, ndjehet fort atmosfera e gëzimit
e edhe e gjallërimit të lutjes. Shumë njerëz shkojnë në Kishë e, në famullinë ku ai
thotë meshën e zakonshme, famullitari i tha se po e kalon gjithë ditën duke rrëfyer.
E rrëfen edhe njerëz, që nuk rrëfeheshin prej 15 a 20 vjetësh, të cilët u pajtuan
me Zotin, në atmosferën e këtij gëzimi e hiri të madh për gjithë Kishën në vend”.
Pastaj u përqendrua tek akuzat, që janë bërë në të kaluarën, për lidhjen
e atë Bergoglios dhe diktaturës argjentinase. “Asnjë lloj lidhjeje, saktësoi atë Lombardi,
duke cituar edhe deklaratat e paradites së sotme, të një jezuiti hungarezo-gjerman,
atë Granz Jalics, një nga priftërinjtë e persekutuar, që arritën të shpëtojnë nga
diktatura argjentinase, në kohën kur Papa Françesku ishte provincial. Kujtoi edhe
dëshminë e pacifistit argjentinas, Adolfo Perez Esquivel. Pastaj atë Lombardi lexoi
edhe një deklaratë mbi këtë ngjarje: “Fushata kundër Bergoglios, e
mirënjohur, ka nisur prej disa vitesh. Çohet përpara nga një shtyp që nxit fushatat
shpifëse e denigruese. Njihet mirë burimi antiklerikal i kësaj fushate, si dhe i akuzave
të tjera kundër Bergoglios. Akuzat kanë të bëjnë me Bergoglion, në periudhën kur
nuk ishte ende ipeshkëv, por epror i jezuitëve në Argjentinë, si dhe me dy meshtarë,
që qenkëshin rrëmbyer e ai nuk i paskej mbrojtur. Ndërsa ekzistojnë një mori deklataratash,
që vërtetojnë se Bergoglio bëri shumë për t’i mbrojtur njerëzit nga diktatura ushtarake.
Njihet mirë roli i Bergoglios, si ipeshkëv, në kërkimin e ndjesës nga ana e Kishës
së Argjentinës, sepse nuk arriti të bëjë aq sa duhet në kohën e diktaturës. Akuzat,
pra, i përkasin përdorimit të analizave historiko-sociologjike të periudhës diktatoriale,
bërë prej vitesh nga elementë të së majtës antiklerikale për ta sulmuar Kishën, prej
këndej, duhen hedhur poshtë vendosmërisht”. Atë Lombardi kujtoi edhe audiencën,
nesër, në Sallën e Palit VI, për punonjësit e komunikimit shoqëror dhe lutjen e Engjëllit
të Tënzot të së dielës, në Sheshin e Shën Pjetrit, në orën 12.00. Pastaj, për sa i
takon Meshës për fillimin e Papnisë, të martën e ardhshme, saktësoi se të gjithë janë
të mirëpritur e se Selia e Shenjtë nuk bën kurrë ftesa të veçanta, as në nivel diplomatik:
“Nuk i drejtohet kurrë ftesë e drejtpërdrejtë asnjë presidenti a kryeministri që të
vijë. Edhe kur vijnë ta takojnë Papën gjatë papnisë, normalisht krerët e shteteve
ose të qeverive nuk ftohen kurrë: janë ata, që shprehin dëshirën për ta parë Atin
e Shenjtë, për të marrë pjesë në ndonjë ngjarje. Të gjitha ata që duan të vijnë, janë
të mirëpritur”. Kujtoi, më pas, se këto ditë, po arrijnë mesazhe urimi
nga mbarë bota: “Një mesazh, që u vlerësua shumë, ishte ai nga ana e Kryerabinit
të bashkësisë hebraike të Romës, doktor Riccardo Segni, të cilit edhe Papa i dërgoi
mesazhin e tij të afërsisë e të miqësisë, duke e njoftuar edhe për përurimin e ardhshëm
të papnisë. Janë të njohura, marrëdhëniet e mira që kishte kardinali Bergoglio në
Argjentinë, me bashkësinë hebraike e edhe me bashkësitë e tjera fetare: me myslimanët
e edhe me gjithë të tjerët. Ja, pra, vijohet në të njëjtën udhë”. Ka shumë
mundësi që marrja në dorëzim e Bazilikës së Shën Gjonit në Lateran, të kremtohet pas
Pashkëve, shpjegoi atë Lombardi e, prej këndej, Mesha e Darkës së Mbrame të Zotit,
të Enjten e Madhe, mund të kremtohet në Shën Pjetër. Duke iu përgjigjur gazetarëve,
shpjegoi edhe se ka shumë mundësi që Benedikti XVI të largohet nga Kastel Gandolfo
në maj, për t’u transferuar në Vatikan, në kuvendin e klauzurës, që vijon të përgatitet
për të.