Папа Францішак, магчыма, будзе карыстацца “Твітэрам”
Сацыяльныя сеткі збіраюць
новых “фанаў” папы Францішка. Новаабраны Пантыфік ужо перад сваім абраннем меў фан-профіль
на “Facebook” па-іспанску. Праз некалькі хвілін пасля абвяшчэння аб выбары кардынала
Хорхе Берголіа на Пасад св. Пятра былі створаны яго фан-старонкі ў той жа сацыяльнай
сетцы на некалькіх іншых мовах: у тым лiку на нямецкай – “Papst Franziskus”, польскай
– “Papież Franciszek”, рускай “Папа Римский Франциск”. Тысячы людзей даслалі на старонкі
свае віншаванні новаабранаму Пантыфіку ў якіх утрымліваюцца ў асноўным добрыя пажаданні,
справіцца з тымі выклікамі, якія стаяць перад ім як Папай. Таксама ў “Твітэры”, на
профілі @Pontifex, якім перад сваёй адстаўкай карыстаўся Бэнэдыкт XVI, з’явілася першае
ад яго сыходу паведамленне “HABEMUS PAPAM FRANCISCUM” (У нас ёсць папа Францішак).
Шматлікія эксперты ўбачылі ў гэтым магчымасць, што новы Пантыфік, таксама як яго папярэднік,
стане карыстацца “Твітэрам” для дыялогу з сучасным светам.