«Անհրաժեշտ Է Մեր Երիտասարդները Համախմբել Մեր Հոգեւոր, Բարոյական Եւ Ազգային Արժէքներուն
Շուրջ» Շեշտեց Արամ Ա. Կաթողիկոս
Երեքշաբթի, 12 մարտ 2013-ի երեկոյեան, Արամ Ա. կաթողիկոս իր գրասենեակին մէջ ընդունեց
Հայ եկեղեցւոյ համալսարանական ուսանողներու միութեան նոր վարչութիւնը` գլխաւորութեամբ
միութեան հոգեւոր խորհրդատու Ղեւոնդ վրդ. Բէնդէզեանին: Նոր վարչութեան մաս կը կազմեն
Ռազմիկ Միքայէլեան (ատենապետ), Լեւոն Նաճարեան, Նազելի Մանուկեան, Կասիա Պարսումեան եւ
Նարէ Սաղտըճեան: Ողջունելով ՀԵՀՈՄ-ի նոր վարչութիւնը` վեհափառ հայրապետը շեշտեց միութեան
կարեւորութիւնը` երիտասարդութիւնը հոգեւոր, բարոյական եւ ազգային արժէքներուն շուրջ համախմբելու
իմաստով: Վեհափառ հայրապետը ըսաւ. «Այս տարի յիսնամեակն է ՀԵՀՈՄ-ին: 50 տարիներ շարունակ
այս միութիւնը ծառայեց` իր շուրջ համախմբելով մեր երիտասարդ-երիտասարդուհիները, որպէսզի
անոնք լիցքաւորուին մեր հոգեւոր, բարոյական, ազգային եւ մշակութային արժէքներով: Որեւէ
ժամանակէ աւելի հրամայական կը նկատենք մեր երիտասարդութեան համախմբումը մեր եկեղեցւոյ
կառոյցներուն ու արժէքներուն շուրջ: Ահա այս ուղղղութեամբ կենսական է դերը ՀԵՀՈՄ-ին»: Ապա
վեհափառ հայրապետը իր տեսակէտներն ու մտահոգութիւնները պարզեց ներկայ ժամանակներու մարտահրաւէրներուն
դիմաց գտնուող հայ երիտասարդութեան մասին: Ան անդրադարձաւ համաշխարհայնացումի հետեւանքներուն,
յատկապէս տեղեկատուական ու մշակութային մարզերուն մէջ: Հանդիպումի աւարտին վեհափառ հայրապետը
թելադրեց նոր վարչութեան, որ յատուկ աշխատանք տանի մեր երիտասարդները համախմբելու հայկական
հոգեւոր ու ազգային կառոյցներուն, ինչպէս նաեւ ՀԵՀՈՄ-ին շուրջ: