Atë Lombardi: Papa Françesku, shërbëtor i Kishës, me thjeshtësi e universalitet
“Një Papë, që dëshiron të shërbejë: kështu u shpreh zëdhënësi i Selisë së Shenjtë,
atë Federiko Lombardi, para gazetarëve të gjithë botës, mbledhur në Qendrën e Mediave
në Vatikan, menjëherë pas zgjedhjes së Papës së 266-të në historinë e Kishës Katolike.
Jorge Mario Bergoglio, Papa Françesku, do të kremtojë meshën e fillimit të papnisë,
të martën, më 19 mars. Që sot, Papa shkoi të gjunjëzohet para Elterit të Zojës në
Bazilikën e Shën Marisë së Madhe dhe pasdite, do të kremtojë meshën me të gjithë kardinajtë,
që mund të shihet drejtpërdrejt në televizion. Atë Lombardi konfirmoi mbrëmë se Papa
Françesku ka folur në telefon me Benediktin XVI. Vota e kardinajve, të shndritur
nga Shpirti i Shenjtë, sqaroi zëdhënësi i Vatikanit, ra mbi një Pasardhës të Shën
Pjetrit jashtë logjikës së pushtetit, duke i dhënë përparësi shërbimit: “Është
absolutisht një zgjedhje, që e refuzon pushtetin e bëhet pastërtisht shërbim. Kjo
më duket se është përgjigjja më e mirë ndaj mënyrës si e panë, menduan dhe e paraqitën
disa, situatën e Kishës gjatë muajve të kaluar”. Atë Lombardi sqaroi më pas,
takimet e ardhshme të Papa Françeskut. Sot pasdite, në orën 17.00, në Kapelën Sikstine,
do të kremtojë meshën me kardinajtë, e cila do të transmetohet në televizion. Nesër,
në orën 11, në Sallën Klementine në Vatikan, do të presë në audiencë kardinajtë, me
të drejtë vote e jo. Gazetarët shpërthyen në duartrokitje, kur atë Lombardi paralajmëroi
se të shtunën, 16 mars, Papa do t’i presë në Sallën Pali VI, siç patën bërë edhe Benedikti
XVI e Gjon Pali II para tij: “Papa na pret në audiencë, të gjithëve ne e të
gjithë ata, që janë në qendrën e shtypit, pra, të gjithë veprimtarët e mediave, të
ardhur për këtë rast”. Drejtori i Sallës së Shtypit të Vatikanit konfirmoi
se të dielën, Papa do të thotë lutjen e Engjëllit të Tënzot nga dritarja e apartamentit
papnor. Më pas, siç tha vetë “i shokuar nga zgjedhja”, iu përgjigj pyetjeve të gazetarëve,
të cilët deshën të informoheshin mbi përshpirtërinë e një Pape jezuit, që mori emrin
Françesk: “Sigurisht, nuk kemi pasur kurrë një Papë jezuit. Jezuitët përpiqen
të jenë shërbëtorë të Kishës, por ai pranoi, duke menduar se ishte detyrë e tij t’i
shërbente Kishës me thjeshtësi të madhe, siç e pamë, dhe me frymë universaliteti.
Shën Injaci na formon pikërisht për të pasur një horizont të gjerë mbi botën e për
t’ua çuar bashkohasve këtë shërbim feje e drejtësie, si dhuratën më të madhe që mund
t’u bëjmë”. E pastaj, për emrin “Françesk”, shtoi: “Më vjen shumë mirë
që zgjodhi emrin Françesk, dëshmitar i madh i Ungjillit; pra, ndjehet përshpirtëria
e rregulltarit, që dëshiron t’i jetojë vlerat e Ungjillit, e që i bën pjesëmarrës
edhe të tjerët, krejt natyrshëm. I jap shumë rëndësi zgjedhjes së emrit “Françesk”…
Nuk zgjodhi emrin “Injac”, por “Françesk”. Do të thotë se ne jemi këtu për t’i shërbyer
Kishës, duke përfshirë të gjitha dhuratat, karizmat, që Zoti na jep për të ndërtuar
Kishën e për të kumtuar Ungjillin”.