2013-03-11 13:32:31

Մէկ Ամիս Առաջ Պենետիկտոս ԺԶ Կը Հրաժարէր Սուրբ Պետրոսի Աթոռէն։


Անցեալ 11 Փետրուար 2013-ին Պենետիկտոս ԺԶ Սրբազան Հայրը - Գոնչիսդորիոյի - այսինքն կարտինալական ժողովի ընթացքին կը յայտարարէր իր որոշումը հրաժարելու Սուրբ Պետրոսի Աթոռէն, տարիքի բերումով եւ ուժերու նուազումի պատճառաւ։

28 փետրուարին այս որոշումը ի զօրու կը դառնար եւ Պենետիկտոս ԺԶ հրաժեշտ առնելով մեկնեցաւ Գասդելկանտոլֆոյի քահանայապետական ամարանոց յայտարարելով թէ ինք պիտի ապրի ''աշխարհէն ծածուկ'' աղօթքի ու խոհրդածութեան կեանք մը։

28 փետրուարի երեկոյեան ժամը 8էն Սուրբ Պետրոսի Աթոռը թափուր մնաց ու ըստ «Universi Dominici Gregis» առաքելական սահմանադրութեան սկիզբ առին նոր Քահանայապետի ընտրութեան վերաբերող բոլոր կարգադրութիւնները որոնց հետեւանքով Կարտինալական դասը 12 մարտը հաստատեց որպէս - Քոնքլաւի - Պապընտիր Ժողովի սկիզբի թուական։

Այսօր երկուշաբթի 11 մարտի առաւօտեան ժամը 9,30 - 12,30 տեղի ունցաւ Կարտինալական դասի - Քոնքլաւի - նախապատրաստական 10րդ նիստը որուն ներկայ գտնուեցան 152 կարտինալներ եւ որուն ընթացքին տեղի ունեցաւ վիճակահանութիւն ընտրելու համար Սենեկապետ Կարտինալի - ''Քամերլէնկօ''- երեք օգնական կարտինալները։ Անոնք են Կարտինալ Նակիպ, եպիսկոպոսական կարգի կարտինալներէն, կարտինալ Ուելլէթ, քահանայական կարգի կարդինալներէն եւ Կարտինալ Մոնթէրիզին, սարկաւագական կարգի կարտինալներէն։ Յայտնենք որ սոյն կարտինալներու իրենց պաշտօնի վրայ կը մնան - ըստ «Universi Dominici Gregis» առաքելական սահմանադրութեան - բոլոր Քոնքլաւի ընթացքին։

Այսօր յետ միջօրէի ժամը 05,30 Պօղոսեան մատրան մէջ տեղի կ՛ունենայ Քոնքլաւի սպասարկող անձնակազմի 90 աշխատակիցներու Երդման արարողութիւնը, որոնք Կարդինալ Թաչիզիօ Պերթոնէի - Քամերլէնկոյի - առջեւ պիտի արտասանեն եւ ստորագրեն ''գաղտնապահութեան բանաձեւը''։

Մինչ վաղը երեքշաբթի 12 մարտի՝ առաւօտեան ժամը 10-ին Կարտինալական դասի անդամները, ըստ առաքելական սահմանադրութեան, Սուրբ Պետրոսի Պազիլիքայի մէջ պիտի մասնակցին, "pro eligendo Pontifice" - Քահանայապետի ընտրութեան համար աղերսական Սբ. Պատարագի արարողութեան, զոր պիտի մատուցէ Կարտիալական Դասի Գահերէց` Կարտինալ Անճէլօ Սոտանոն։ Իսկ յետ միջօրէի ժամը 16,30 սկիզբ կ՛առնէ Քոնքլաւը - Պապընտիր ժողովը։









All the contents on this site are copyrighted ©.