Ватыканскі выдаўца: Бэнэдыкт XVI заслугоўвае Нобелеўскай прэміі па літаратуры
Бэнэдыкт XVI заслугоўвае
Нобелеўскай прэміі па літаратуры. Такое меркаванне выказаў 10 сакавіка дырэктар Ватыканскага
выдавецтва кс. Джузэпэ Коста ў інтэрв’ю інфармацыйнаму агенцтву італьянскага епіскапата.
Святар адзначыў, што літаратурны стыль Бэнэдыкта XVI з’яўляецца вельмі сучасным. На
яго думку, Папа здолеў змяніць рэлігійную мову, зрабіўшы яе больш актуальнай, непасрэнай,
зразумелай і пазбаўленай “барочных” элементаў. Гаворачы пра недапісаную Пантыфікам
энцыкліку аб веры, кс. Коста выказаў гіпотэзу, што яна можа быць выдадзена ў якасці
кнігі. “Як выдавецтва, мы заўсёды адкрытыя на тое, каб яе апублікаваць”, - сказаў
ён. Святар расказаў, што да навучання Бэнэдыкта XVI праяўляюць цікавасць выдавецтвы
ў розных краінах. Напрыклад, выданне яго апошніх прамоў у адной кнізе, было зроблена
па просьбе 7 розных еўрапейскіх выдавецтваў. “Без сумніву, Папа паспрыяў развіццю
Ватыканскага выдавецтва”, - адзначыў ён. Дырэктар нагадаў, што публікацыя навучання
Рымскіх Пантыфікаў з’яўляецца неад’емнай місіяй установы якую ён узначальвае. Таму
тут выходзілі ўсе тэксты Бэнэдыкта XVI: ад катэхез да энцыклік, і ў самых розных фарматах:
ад простых і танных, да па-мастацку аздобленых і дарагіх.
“Тэалагічная і культурная
веліч Бэнэдыкта XVI не паддаецца вымярэнню. Ён адзін з самых вялікіх тэолагаў старой
закалкі, з энцыклапедычнымі ведамі. Зараз лёгка знайсці добрых тэолагаў, але канешне,
не такой велічыні”, - сказаў святар. Між іншым ён падзяліўся, што ў бліжэйшы час у
Ватыканскім выдавецтве, рыхтуюцца да выдання катэхезы Бэнэдыкта XVI аб Годзе веры,
а таксама кніга “У палёце з папам Бэнэдыктам”, у якой будуць сабраны інтэрв’ю Пантыфіка,
дадзеныя журналістам падчас пералётаў у рамках яго падарожжаў.