Գոնքլաւի Նախապատրաստական Կարտինալական 5րդ եւ 6րդ Նիստերը։

Հինգշաբթի 7 մարտի` առաւօտեան 9,30-12,30 Վատիկանի Պօղոս Զ. անուան սիւնհոդոսական սրահին մէջ, տեղի ունեցաւ Գոնքլաւի նախապատրաստական Կարտինալական ընդհանուր ժողովի հինգերորդ նիստը, որուն մասնակցեցան 152 կարտինալներ։
Հինգերորդ նիստի ընթացքին կատարուեցաւ նաեւ վիճակահանութիւն որուն ընթացքին նշանակուեցան Սենեկապետ Կարտինալի - ''Քամերլէնկօ''- երեք օգնական կարտինալները յանձինս` Կարտինալ Ռայիին, եպիսկոպոսական կարգի կարտինալներէն, կարտինալ Մոնսէնկուոյի, քահանայական կարգի կարդինալներէն եւ Կարտինալ Տէ Բաոլիսի, սարկաւագական կարգի կարտինալներէն։ Յայտնենք որ սոյն կարտինալներու պաշտօնը - ըստ «Universi Dominici Gregis» առաքելական սահմանադրութեան - կը տեւէ միայն երեք օր ու ապա նոր վիճակահանութեամբ կ՛որոշուին ուրիշ երեք նոր օգնական կարտինալներ։
Նշենք նաեւ որ յետ միջօրէի ժամը 17-ին տեղի կ՛ունենայ կարտինալական դասի վեցերորդ նիստը։