Dom Gaspër Gjini, meshtar e historian, në përvjetorin e vdekjes
Si sot, më 7 mars 1985 ndërroi jetë prifti e historini i shquar kosovar, dom Gaspër
Gjini. Meshtari i jashtëzakonshëm e studiuesi i madh, dr. dom Gaspër Gjinit, nga
Kosova, lindi më 24 shtator 1930 në Ferizaj, në familjen e madhe të Kolës e
të Dushe Gjinit, që lindën, rritën e edukuan 12 fëmijë. Gaspri u shugurua meshtar
më 2 korrik 1955. Më vonë shkoi në Romë, ku pas studimeve filozofike e teologjike
në Universitetin Papnor Urbaniana, më 1968 mbrojti doktoratën me temën “Mbi burimet
historiko-juridike të Kishës së Shkupit”. Pjesën më të madhe të jetës, dom
Gaspër Gjini ia kushtoi veprimtarisë ungjillëzuese e baritore, në fillim si sekretar
i ipeshkvit të asaj kohe, më pas si kancelar i dioqezës së Shkup-Prizrenit dhe si
famullitar në Ferizaj e së fundi në Shkup. Vite me radhë shërbeu si kryetar i Gjyqit
kishtar të dioqezës së përmendur dhe si studiues e bashkëpunëtor i zellshëm i revistës
fetaro-kulturore “Drita”. Gjatë kësaj kohe don Gaspër Gjini përpiloi dhe botoi librin
e uratëve “Shûjta shpirtërore” dhe shkrime tjera të rëndësishme mbi Koncilin
e Dytë të Vatikanit, duke shpalosur kështu para botës shqiptare mësimet e reformat
e rëndësishme kishtare që solli Koncili II i Vatikanit. Mbylli sytë, si sot,
më 7 mars 1985 në spitalin e Beogradit, në sa ishte në kulmin e pjekurisë shkencore.
Don Gaspër Gjini qe njeri me virtyte të rralla, me kulturë poliedrike, na la trashëgim
veprën madhore postume: "Ipeshkvia Shkup -Prizren nëpër shekuj", botuar në
Zagreb, më 1992.