E diel, 3 mars, Kisha katolike kremton të Dielën e Tretë të Krezhmëve.
E gjithnjë më 3 mars kalendari kujton edhe shën Kunegonden, bashkëshorte të Enrikut
II perandor. Liturgjia na fton të kthehemi në udhën e Zotit e t’i përmbahemi urdhrit
të dashurisë së Tij Hyjnore, e kështu na kujton se vërtetë i lum është vetëm njeriu
që i qëndron besnik ligjit të Zotit. Të hënën më 4 mars, kalendari kishtar
përkujton shën Kazimirin. Liturgjia na kujton se mbretëria e Zotit realizohet në mënyra
të ndryshme. Në se e humbasim, faji nuk është i Zotit, por yni, që s’ ditëm ta fitojmë. Të
martën më 5 mars, kalendari kujton shën Lucjanin I Papë, sShën Adrianin martir
e shën Gjonin e kryqit, meshtar françeskan. Liturgjia e ditës na kujton se dashuria
e mëshira shkojnë krah për krah. Në se nuk e kuptojmë këtë, jo vetëm që nuk mund ta
quajmë veten bij të Hyjit, por rrezikohemi të meritojmë dënimin e përjetshëm. Prej
këndej, të lutemi me Psalmistin: “Na fal, o Zot, në mëshirën tënde!”. Të mërkurën
më 6 mars, kalendari liturgjik përkujton shën Rozën nga Viterbo, virgjër françeskane
dhe shën Koletën Boilè, themeluese e klariseve të varfra. Liturgjia e ditës na kujton
sa i madh është ndryshimi ndërmjet asaj që themi e asaj që bëjmë. Duke pasur për model
Atin qiellor e për mësues Krishtin, të mos harrojmë kurrë se duhet të sillemi si shërbëtori
para zotërisë e si nxënësi para mësuesit. Të enjten më 7 mars, kalendari
kujton shenjtoret Perpetua e Feliçita. Liturgjia e ditës na kujton se mbretëria e
Hyjit ndryshon krejtësisht nga mbretëritë e kësaj bote. Kush dëshiron të hyjë në të,
duhet të ecë në udhën e shërbimit e të pijë kelkun e mundimeve. Të premten
më 8 mars, kalendari kujton shën Gjonin e Zotit, themelues i Kongregatës Fatebenefratelli,
pajtor i të sëmurëve e i punonjësve të spitaleve. Liturgjia e ditës na kujton vlerën
e bamirësisë, të solidaritetit, se dhe faktin se shijimi i të mirave të kësaj bote
jo vetëm që nuk na i siguron të mirat e jetës së amshuar, por përkundrazi, na rrezikon
t’i humbasim. Fati në jetën tjetër varet nga mënyra e përdorimit të të mirave të kësaj
bote. Të shtunën më 9 mars, kalendari kujton shën Françesken romake, themeluese
e Oblateve të Tor’ de Speki, dyzet Martirët e Sebastes dhe shën Katerinën e Bolonjës.
Liturgjia e ditës na kujton se Mbretëria e Zotit realizohet në mënyra të ndryshme.
Në se e humbasim, faji nuk është i Zotit, por yni, që s’ ditëm ta fitojmë. Të
dielën e ardhshme më 10 mars, Kisha do të kremtojë të dielën e Katërt të Krezhmëve,
e gjithnjë më 10 mars kalendari kujton shën Simpliçin, papë dhe shën Gjonin Ogjilviè,
meshtar jezuit e martir. Pjesa e Ungjillit të kësaj dite na sjell shëmbëlltyrën e
djalitplangëprishës për të na mësuar gëzimin e dashurinë ndaj çdo njeriu që kthehet
tek Zoti dhe gëzimin e rikuperimit të çdo marrëdhënie ndër vëllazërore me tjetrin.