Selia Vakante e Kishës sipas Kushtetutës “Universi Dominici Gregis"
Me përfundimin e Papnisë së Benediktit XVI, kardinajtë mblidhen në Romë, pas marrjes
se fletë-thirrjes dërguar atyre nga kardinali dekan, Anxhelo Sodano. Kështu fillon
përgatitja e Konklavit, data e të cilit vendoset nga kardinajtë në Kongregacionet
e përgjithshme duke u nisur nga dita e hënë 4 mars. Në mbledhjet e përgjithshme që
nisin javën e ardhshme, kardinajtë do të diskutojnë për Kishën Katolike dhe sfidat,
synimet e problemet e saj, në përpjekjen për të përvijuar, me ndihmën e Shpirtit Shenjt
Zot, profilin e Papës së ardhshëm, që i nevojitet krishterimit e Kishës.
Po
si duhet ta kalojnë besimtarët këtë periudhë, para zgjedhjes së Pasardhësit të ri
të Shën Pjetrit? Na ndihmon për këtë Kushtetuta Apostolike “Universi Diminici
Gregis”, me të cilën i Lumi Gjon Pali II miratoi normat e Konklavit, që janë në fuqi
edhe sot. Në të përshkruhet se me ç’ndjenja duhet ta shoqërojnë besimtarët, këtë periudhë
të rëndësishme të Kishës.
Në nenin 84, thuhet: “Gjatë kohës së Selisë
Vakante, e sidomos gjatë periudhës së zgjedhjes së Pasardhësit të Shën Pjetrit, Kisha
bashkohet në mënyrë të veçantë me barinjtë e saj e veçanërisht, me kardinajtë zgjedhës
të Papës dhe, i lutet Zotit t’i japë Papën e ri, dhuratë e mirësisë dhe e provanisë
së Tij. Vërtet, sipas shembullit të bashkësisë së parë të krishterë, për të cilën
flitet në Veprat e Apostujve (shih 1,14), Kisha universale, shpirtërisht e bashkuar
me Marinë, Nënën e Jezusit, duhet të vazhdojë të lutet unanimisht; kështu, zgjedhja
e Papës së ri nuk do të jetë një fakt i izoluar nga Populli i Zotit, që ka të bëjë
vetëm me Kolegjin e kardinajve me të drejtë vote, por, në një farë kuptimi, do të
jetë veprim i krejt Kishës. Prandaj – shkruan Papa Gjon Pali II në Kushtetutë – në
të gjitha qytetet e në vendet e tjera, të paktën në ato më të shquarat, sapo të merret
vesh lajmi i Selisë Apostolike Vakante… t’i drejtohen lutje të përvuajtura e të vazhdueshme
Zotit (shih Mt 21,22; Mk 11,24), që të shndrisë shpirtin e zgjedhësve dhe t’i bëjë
të merren vesh për detyrën e tyre, në mënyrë që të arrihet në zgjedhjen unanime e
të frytshme, ashtu siç e kërkon qetësia e shpirtrave dhe e mira e gjithë Popullit
të Zotit".
Neni 85 vazhdon, gjithnjë me fjalët e të Lumit Gjon Pali
II: “Ua këshilloj këtë me gjithë shpirt e me përzemërsi etërve të nderuar kardinaj
që, për arsye moshe, nuk e gëzojnë më të drejtën e pjesëmarrjes në zgjedhjen e Papës.
Për hir të lidhjes shumë të veçantë, që ka purpuri kardinalor me Selinë Apostolike,
të jenë të gatshëm për ta udhëhequr Popullin e Zotit, të mbledhur veçanërisht në Bazilikat
Patriarkale të qytetit të Romës dhe në vendet e kultit të Kishave të tjera, që me
lutje të vazhdueshme dhe intensive, sidomos gjatë procesit zgjedhor, të nxjerrin nga
Zoti i Gjithpushtetshëm ndihmën dhe shndritjen e Shpirtit Shenjt, të nevojshme për
sivëllezërit me të drejtë vote, duke marrë pjesë kështu frytshëm dhe me të vërtetë
në detyrën e vështirë për t’ dhënë Kishës universale Bariun e vet".
E së
fundi, në nenin 86, përshkruhen ndjenjat me të cilat Papa Gjon Pali II shkruante
këtë Kushtetutë: "I lutem, pastaj, atij, që do të zgjidhet, të mos tërhiqet nga
kjo detyrë, në të cilën është i thirrur, nga frika e peshës së saj, por t’i nënshtrohet
me përvuajtëri planit të Vullnetit Hyjnor. Vërtet, Hyji, kur ia imponon këtë detyrim,
e mban me dorën e Vet, që të jetë në lartësinë e duhur për ta plotësuar; duke i dhënë
këtë detyrë të rëndë, i jep edhe ndihmën për ta kryer e, duke i dhuruar këtë dinjitet,
i jep edhe forcën, që të mos tutet nën peshën e këtij ministeri".