Të gjitha udhët të çojnë te Pjetri. Përshëndetja e Benediktit XVI për mbarë botën,
në javën e fundit të papnisë
Nuk kishte ndodhur kurrë të përjetonim javën e fundit të një papnie, me Papën gjallë.
Në shekujt e epokës moderne, Kisha Katolike ka marrë pjesë në netët e agonisë, në
funeralet e në përkujtimet e papëve të vdekur, që e kanë lënë Selinë e Shën Pjetrit
Vakante, pasi janë bashkuar me Atin Qiellor. Por kësaj radhe, patëm një papë krejtësisht
të vetëdijshëm, në gjendje të ecë e të lëvizë, të mendojë e të veprojë; një papë,
që javën e kaluar përgatiti valixhet për të shkuar nga Vatikani në Kastel Gandolfo,
ku porta e mbyllur të enjten, 28 shkurt, në orën 20.00, shënoi edhe fundin e papnisë
e fillimin e Selisë Vakante. Javë e jashtëzakonshme, historike, emocionuese, që nuk
do të harrohet kurrë. E gjesti i vetëdijshëm i Benediktit XVI për t’u tërhequr nga
shërbimi i tij në krye të Kishës ka dhënë që tani, të paktën dy fryte: bota mbarë
u shtrëngua rreth Atit të Shenjtë, për t’i shprehur dashurinë, por sidomos duke e
ndjerë veten, më shumë se kurrë, Kishë e Krishtit; dhe së dyti, besimtarët iu kthyen
lutjes, atij gjunjëzimi para Zotit, që Jozef Racinger e pati predikuar shpesh gjatë
papnisë. “Papa lutet – thoshin njerëzit nëpër rrugë. Edhe ne me të! Nuk do ta lemë
vetëm!” Por, ta përshkojmë së bashku javën e kaluar. Të hënën, Benedikti
XVI priti tre kardinajtë e Komisionit “Vatileaks”, Herranz, Tomko e De Giorgi. Aktet
e këtij Komisioni, që hetoi për çështjen e dokumenteve të dala jashtë apartamentit
papnor dhe të botuara në shtyp, do të mbeten në dispozicion vetëm të Papës së ardhshëm. Të
mërkurën, në audiencën e fundit të përgjithshme të Benediktit XVI, u prek me dorë
dhe u përjetua universaliteti i Kishës, së mbledhur rreth Pasardhësit të Shën Pjetrit.
Asnjë gjuhë nuk është e huaj për një papë, sepse ai flet gjuhën e dashurisë së Krishtit.
Në atë ditë të mrekullueshme, plot diell, bekim prej Zotit, Jozef Racinger i tha Kishës
Katolike, por edhe gjithë botës, se nuk e ka ndërmend të zbresë nga Kryqi i Krishtit,
por të qëndrojë pranë Hyjit, në një formë tjetër, me lutje. Mesazhi i Benediktit
XVI qe i fuqishëm: “Zoti e udhëheq Kishën, e mban gjithnjë, edhe, e sidomos
në çastet e vështira. Të mos e humbasim kurrë këtë këndvështrim bazuar në fe, i vetmi
këndvështrim i vërtetë për udhën e Kishës e të botës. Në zemrat tona, në zemrën e
secilit prej nesh, të banojë gjithnjë siguria e lume se Zoti është pranë nesh, nuk
na braktis, është afër e na përqafon me dashurinë e Tij”. Të gjitha udhët çojnë
në Romë, thotë një fjalë e urtë romake. Në Romë, domethënë te Shën Pjetri. Njerëzit
e ardhur nga e gjithë bota për audiencën e fundit të përgjithshme të Benediktit XVI
sollën në Vatikan gjuhë e idioma të njohura e të panjohura. Shiheshin flamuj nga çdo
vend, edhe flamuri shqiptar; veshje e kapela nga të gjitha llojet e ngjyrat, që flisnin
për kultura e tradita të afërta e të largëta. Është “mrekullia” e vogël, që ndodh
çdo të mërkurë: askush nuk e ndjen veten të huaj në Sheshin e Shën Pjetrit. Është
përmasa e universalitetit të Kishës, që të mërkurën e kaluar, përjetoi një nga çastet
e saj kulmore. E kjo u duk edhe në përshëndetjet e Benediktit XVI, në 12 gjuhë të
ndryshme, për shtegtarët e të gjithë botës: “Je vous remercie pour le respect…” “Ju
falenderoj – tha në frëngjisht – për respektin dhe mirëkuptimin, me të cilin e pranuat
tërheqjen time”. Pastaj nënvizoi se do të vazhdojë ta shoqërojë Kishën me lutje e
reflektime. I inkurajoi besimtarët ta kenë zemrën plot me gëzim e me sigurinë se Zoti
do ta mbajë gjithmonë Kishën. Benedikti XVI iu drejtua bashkombasve të tij, gjermanëve,
të cilët, spontanisht i kushtuan një këngë, para se t’u fliste: “Wie Petrus
und die Jünger…” “Ashtu si Pjetri dhe dishepujt në barkën mbi liqenin e
Galilesë – u tha – unë e dija se Zoti ndodhej në Barkë, e cila është e Tij. Asgjë
s’mund ta errësojë këtë bindje”. Ja sepse, një Papë nuk është kurrë vetëm në udhëheqjen
e grigjës së Zotit. E në anglisht, u tregoi besimtarëve se ndjehej si Shën Pali Apostull,
i cili e kishte zemrën plot me mirënjohje ndaj Zotit, që gjithmonë e udhëheq Kishën: “In
union with Mary and all the saints…” “Në bashkim me Marinë e me të gjithë
shenjtorët – ftoi Jozef Racinger – besojani me shpresë vetveten Zotit, i cili vazhdon
të vigjëlojë mbi jetën tonë, mbi udhën e Kishës e të botës, përgjatë shtigjeve të
historisë”. Fjalët e Papës ndërpriteshin nga duartrokitjet, nga koret, që thoshin
“faleminderit” në të gjitha gjuhët e globit. Edhe në spanjisht e protugalisht, gjuhë
të folura nga shumica e katolikëve të botës, Benedikti XVI shqiptoi fjalë shprese
për të ardhmen: “En este Año de la fe invito a todos…” “Në këtë
Vit të Fesë, i ftoj të gjithë të rinovojnë besimin e plotë në Zotin, me sigurinë se
Ai na mban e na do”. Jozef Racinger u kërkoi të gjithëve ta dëshmojnë krishterimin
me gëzimin tipik të fesë në Krishtin. Sheshi u përlot e u mallëngjye, por nuk shihej
trishtim në sytë e njerëzve, pavarësisht se po merrnin pjesë në audiencën e fundit
të papnisë së Benediktit XVI. Përshëndetja e këtij populli shumëkombësh për Papën
nuk ishte “lamtumirë” e as “mirupafshim”, pasi siç tha ai vetë në kroatisht, “nën
mbrojtjen e Nënës qiellore, mbetemi të bashkuar në lutje e në fe, në Krishtin e ringjallur”. Në
mbrëmjen e së mërkurës, filloi nata e fundit e Benediktit XVI në Vatikan. Rreth
3 mijë rregulltarë e shumë të rinj të organizatës kishtare “Papaboys” u mblodhën në
Sheshin e Shën Pjetrit e, me qirinj ndër duar, tri kitarra e zemrën mbushur me mirënjohje,
organizuan një Ditë të vogël Botërore të Rinisë. Më të vendosurit, ndenjën aty deri
në orën 23.45, çasti kur sekretari personal i Papës, don Georg doli në dritare për
t’i përshëndetur me dorë. Dritat e apartamentit papnor u fikën e të rinjtë u larguan
gati në majë të gishtave, për të mos prishur me zhurmë, natën e fundit të një pape. Të
enjten, dita e fundit e papnisë së Benediktit XVI, takimi me kardinajtë dhe përqafimi
me besimtarët në Kastel Gandolfo. “Jemi përpjekur t’i shërbejmë Krishtit e
Kishës së Tij, - u tha Jozef Racinger kardinajve - me dashuri të thellë e të madhe,
shpirti i ministerit tonë. Kemi dhuruar shpresë, atë që vjen nga Krishti, e vetmja,
që mund ta shndrisë udhën”. E pastaj, bindja e tij më e thellë: “Kisha
nuk është ndonjë institucion i shpikur dhe i ndërtuar enkas, por një realitet i gjallë.
Ajo jeton përgjatë kohës që vjen, në plotësim e sipër, si çdo qenie gjallë, duke u
shndërruar e, megjithatë, natyra e saj mbetet gjithnjë po ajo. Zemra e saj është Krishti”. Kisha,
u tha kardinajve Benedikti XVI, përtërihet në bijtë e vet, në të gjithë ata, që ia
hapin zemrën Fjalës së Zotit dhe e bëjnë Krishtin të lindë sërish në botë, me po atë
përvuajtëri, që pati Shën Maria Virgjër kur pranoi planin e Hyjit për të. Në orën
17.07, helikopteri me Jozef Racinger ngrihet në qiellin e Romës për të shkuar në Kastelgandolfo.
Të mrekullueshme imazhet e këtij fluturimi mbi Qytetin e Amshuar, të transmetuara
nga Qendra Televizive e Vatikanit. Pastaj, përqafimi me besimtarët e mbledhur në oborrin
e Pallatit Apostolik, në qytezën laciale. Të shumtë e të përlotur, dëgjojnë Benediktin
XVI, që s’pushon së falenderuari: “Tani, jam thjesht një shtegtar, që fillon
etapën e fundit të shtegtimit të tij në këtë botë. Dua të punoj akoma me zemër, me
dashuri, me lutje, me reflektime, me të gjitha forcat e brendshme, dua të punoj për
të mirën e përbashkët, për të mirën e Kishës e të njerëzimit”. Në orën 20.00,
imazhet sugjestive të mbylljes së portës së Pallatit Apostolik në Kastel Gandolfo
shënuan fundin e papnisë së Benediktit XVI. Filloi Selia Vakante.