Папа спачувае ў сувязі са смерцю французскага кардынала
Бэнэдыкт XVI спачувае
ў сувязі са смерцю французскага кардынала Жана Анарэ. Іерарх адыйшоў у вечнасць раніцай
28 лютага на 93 годзе жыцця. У спачувальнай тэлеграме на імя арцыбіскупа Турскай дыяцэзіі,
якой на працягу 16 гадоў кіраваў памерлы іерарх, Папа назваў яго “верным пастрам,
які аддана служыў Касцёлу на ніве каталіцкай адукацыі і катэхізацыі”. Святы Айцец
асабліва ўзгадаў пра “запал”, з якім кардынал Анарэ прымаў удзел у рэдагаванні Катэхізіса
Каталіцкага Касцёла і абвяшчэнні Евангелля сучаснаму свету. Кардынал Анарэ працаваў
у групе рэдактараў Катэхізіса пад кіраўніцтвам Ёзэфа Ратцынгера, тады яшчэ прэфекта
Кангрэгацыі Веравучэння. Акрамя таго, іерарх займаўся выкладчыцкай дзейнасцю і
душпастрыствам студэнтаў. Ён клапаціўся, каб менавіта свецкія вернікі і бацькі студэнтаў
займаліся справай евангелізацыі. Кардынал Анарэ быў заснавальнікам французскага часопіса
для катэхетаў, а таксама арганізатарам кангрэсаў, якія збіралі да некалькіх тысяч
выкладчыкаў рэлігіі з усяго свету.