Թուրքիոյ Մէջ Բողոքի Ցոյց՝ Ընդդէմ Ազերիներու Հակահայ Հաւաքներուն
ԵՐԵՒԱՆ, «Արմէնփրէս».- Պոլսոյ Կալաթասարայի հրապարակին վրայ Փետրուար 25ին ցեղապաշտութեան
եւ այլատեացութեան դէմ բողոքի զանգուածային ցոյց մը տեղի ունեցած է՝ ի պատասխան Խոջալուի
իրադարաձութիւններուն հետ կապուած Փետրուար 24ի ատրպէյճանցիներու հակահայ հաւաքին: Ըստ
թրքական «Տեմոքրաթհապեր» համացանցային լրատուական կայքին՝ հակահայ ցոյցին դէմ բողոք արտայայտելու
համար Կալաթասարայի հրապարակ դուրս եկած է մօտաւորապէս 10,000 ցուցարար, որոնց մէջ եղած
են տարբեր կուսակցութիւններու եւ կազմակերպութիւններու ներկայացուցիչներ, ներառեալ՝ Թուրքիոյ
կառավարութեան գլխաւոր ընդդիմադիր Հանրապետական ժողովրդային կուսակցութեան պատգամաւոր
Մահմուտ Թանալը, ինչպէս նաեւ բազմաթիւ լրագրողներ: Հաւաքուածներու անունով ելոյթ ունեցած
է լրագրող Եաշար Կիւվեն, որ նշած է, թէ արտաքին գործոց նախարարին հովանաւորութեամբ «Խոջալուի
իրադարաձութիւններ»ու մասին յիշատակ-հաւաքի կազմակերպումը՝ Թուրքիոյ մէջ ատելութիւն կը
քարոզէ հայ ժողովուրդին դէմ: «Հաւաքին ընթացքին հնչած են վիրաւորանքներ եւ սպառնալիքներ:
Խոջալուի իրադարձութիւններու անուան տակ ատելութիւն կը քարոզուի հայերու նկատմամբ: Բայց
մեզ այդպէս աժան չեն կրնար գնել: Այդ պատճառով ալ մենք հիմա հոն ենք: Մենք հայերուն մինակ
չենք ձգեր: Մենք համամարդկային արժէքներ դաւանող մարդկանց կոչ կ՛ընենք միաւորուելու ցեղապաշտութեան,
այլատեացութեան եւ ազգայնամոլութեան դէմ», ըսած է թուրք լրագրողը