Бэнэдыкт XVI: сям’я – адзіная сіла здольная перамяніць свет
Любоў, да якой пакліканы
сем’і – гэта адзіная сіла здольная перамяніць свет. Гэту праўду на працягу амаль 8
гадоў свайго пантыфіката імкнуўся данесці Бэнэдыкт XVI. Шлях Касцёла, галоўная дзеючая
асоба новай евангелізацыі, фундамент грамадства, але адначасова інстытут, які знаходзіцца
пад пагрозай – так Святы Айцец акрэсліваў сям’ю. Увага да небяспекі, якая існуе, для
гэтага фундаментальнага для чалавецтва інстытута, не абмяжоўвалася толькі канстатацыяй
негатыўных тэндэнцыі, але пераўтваралася ў заклік Пантыфіка супрацьстаяць “фальшывым
ідэалогіям” і “секулярызму, які вядзе да выключэння Бога з жыцця і спрыяе разбурэнню
сем’яў”.“У наш час, як і ў папярэднія эпохі, забыццё Бога, распаўсюджванне ідэалогій
варожых сям’і, а таксама занядбанне сексуальнай этыкі, здаюцца звязанымі паміж сабой.
Як знітаваны забыццё Бога і крызіс сям’і, так новая евангелізацыя неразлучная з хрысціянскай
сям’ёй”, - казаў Бэнэдыкт XVI.
Паводле Папы, хрысціянскія сем’і – маленькія
хатнія касцёлы, тэрмінова пакліканы стаць галоўнымі дзеючымі асобамі грамадства –
“паказаць свету любоў і прысутнасць Хрыста”. Аднак, Святы Айцец свядомы: у сучасным
свеце захаваць сям’ю нялёгка і аб гэтым сведчаць шматлікія разводы. “Адно слова я
хацеў б прысвяціць вернікам, якія хоць і падзяляюць навучанне Касцёла аб сям’і, але
маюць балючы досвед падзення і разводу. Ведайце, што Папа і Касцёл падтрымліваюць
вас у цяжкасцях. Я заклікаю вас заставацца ў адзінстве з вашымі супольнасцямі, і адначасова
прашу дыяцэзіі рэалізоўваць адпаведныя ініцыятывы адкрытасці і блізасці”, - казаў
Святы Айцец.
У якасці прыкладу, ад якога сужонкі могуць вучыцца трывалым і
моцным адносінам Пантыфік прыводзіў Святую Сям’ю з Назарэта. Менавіта ўглядаючыся
ў яе, паводле Святога Айца сем’і могуць станавіцца маленькімі школамі малітвы і выхоўваць
грамадзян, якія будуць адказнымі і шляхетнымі.