Më 26 shkurt kalendari kishtar përkujton Shën Aleksandrin, Patrik të Aleksandrisë.
Pra sot më 26 shkurt kalendari kishtar përkujton njërin nga shenjtorët më të njohur
me emrin Aleksandër, kampionin e fesë, Patrikun e Aleksandrisë, protagonistin e luftës
kundër herezisë ariane. I lindur rreth viti 250, njeri me kulturë të thellë, zell
të zjarrtë fetar e mirësi të jashtëzakonshme njerëzore, Shën Aleksandri u zgjodh Patrik
i Aleksandrisë së Egjiptit në vitin 313. I kushtoi menjëherë kujdes të veçantë edukimit
të klerikëve e sidomos zgjedhjes së tyre nga radhët e njerëzve që dalloheshin për
virtyte. Iu desh të ndeshej vazhdimisht me herezinë e shpallur nga Ario, e cila
përhapej me vrull në gjithë Lindjen. Aleksandri ia doli ta mundte vetëm pas Koncilit
të Nikesë, në të cilin arianizmi u dënua përfundimisht. Vdiq më 26 shkurt të vitit
328, duke lënë pas, si vazhdues të idealeve të tij, diakonin luftarak, Atanasio (Athanasin),
që i zuri vendin në fronin ipeshkvnor dhe që shëroi plagët e fundit që kishte hapur
në Kishë herezia ariane.