Պենետիկտոս ԺԶ Սրբազան Քահանայապետի Ինքնակամ Գրութիւնը։

Երկուշաբթի 25 փետրուարի կէսօրին, Վատիկանի մամլոյ գրասենեակի Պօղոս Զ. անուան սրահին մէջ տեղի ունեցած մամլոյ ասուլիսի մը ընթացքին ներկայացուեցաւ Պենետիկտոս ԺԶ Սրբազան Քահանայապետի, 22 փետրուար թուակիր Ինքնակամ Գրութիւնը, որ կը բարեփոխէ Սրբազան Հօր 2007-ին հրատարակած, Պապընտիր Ժողովներու օրէնսդրութեան հայող ''Universi Dominici Gregis'' Ինքնակամ գրութեան որոշ կանոնները, ''ապահովցնելու նպատակով Սրբազան Քահանայապետի ընտրութեան գործընթացի լաւագոյն կատարումը'' ու ''մասնաւորապէս մի քանի յօդուածներու յստակ մեկնաբանութիւն մը տալու։''

Մամլոյ ասուլիսի ընթացքին ներկայացուեցան Ինքնակամ գրութեան կեդրոնական մի քանի կէտեր, որոնցմէ նշենք ''Գոնքլավի գումարման թուականը''։ Արդարեւ ''Universi Dominici Gregis'' խորագիրը կրող Ինքնակամ Գրութեան մէջ հաստատուած էր թէ ''Գոնքլավը'' պէտք է գումարուի ''Թափուր Աթոռէն'' - Sede Vacante - սկսեալ 15 - 20 օր ետք։ 2013-ի 22 փետրուարի Իքնակամ գրութեամբ Կարդինալական դասին իրաւունք կը տրուի վերոյիշեալ ժամանակաշրջանը կանխել պայմանաւ որ կարդինալական դասի բոլոր անդամները արդէն ժամանած ըլլան Հռոմ։

Իքնակամ գրութիւնը ապա դարձեալ կը հաստատէ թէ քուէներու մեծամասնութիւնը կը կազմուի քուէներու առնուազն 2/3 ու կ՛ընգծէ բացարձակ գաղտնապահութեան պարտականութիւնը։ Գոնգլավի ընթացքին Կարդինալները որեւէ շփում չեն կրնար ունենալ Գոնգլավէն դուրս անձերու հետ, այս առնչութեամբ Գոնգլավէն առաջ անոնցմէ պահանջուած է ''գաղտնապահութեան երդում'' կատարել ։ 2013-ի Ինքնակամ գրութիւնը ապա ոչ ընտրող կարդինալներուն կը թոյլատրէ մասնակցիլ Գոնքլաքի առաջին օրուայ ''Ընտրուելիք Պապին Համար'' մատուցուած համապատարագին ։