Konferencë shtypi e imzot Çelatës dhe e atë Lombardit
Drejtori i Sallës së Shtypit të Vatikanit, atë Federiko Lombardi mbajti sot një konferencë
shtypi për të folur mbi tema të ndryshme. Kryesorja, Motu Proprio e Papës Benedikti
XVI dhe ndryshimet në procedurën e zgjedhjes së Papës së ri. Pastaj, takimi i Atit
të Shenjtë me kardinajtë e Komisionit hetimor për daljen e dokumenteve të rezervuara
jashtë apartamentit papnor, si edhe tërheqja e kardinalit skocez Keit O’Brajën, i
cili nuk do të marrë pjesë në Konklavin e ardhshëm. Benedikti XVI – shkruhet në
komunikatën, që u lexua gjatë takimit me gazetarët – falenderoi kardinajtë e Komisionit
hetimor për punën e bërë “duke shprehur kënaqësinë për rezultatet e hetimit”. Në dokumentin,
që i është dorëzuar Papës nga tre kardinajtë – që kujtojmë janë Herranz, Tomko dhe
De Giorgi – përkrah kufizimeve dhe të metave karakteristike të komponenteve njerëzore
të çdo institucioni, vihet në dukje edhe bujaria, ndershmëria dhe përkushtimi i sa
e sa punonjësve të Selisë së Shenjtë. Papa – shkruhet më tej në komunikatë – vendosi
që aktet hetimore, përmbajtjen e të cilave e di vetëm Shenjtëria e Tij, të mbeten
në dispozicion vetëm të Papës së ardhshëm. Atë Federiko Lombardi sqaroi: “Këtu
përfundon mandati i Komisionit, pra “pas plotësimit të detyrës’. Prandaj, Komisioni
është shpërndarë që sot paradite. Papa vendosi që raporti të jetë në dispozicion të
pasardhësit të tij”. Përsa i përket tërheqjes së kardinalit O’Brajën, të cilën
Papa e ka pranuar, atë Lombardi tha: “Komunikata jonë nuk i referohet pjesëmarrjes
në Konklav. I referohet drejtimit të dioqezës së Edimburgut, udhëheqje që përfundon
përmes kësaj tërheqjeje”. Imzot Pierluigji Çelata, zv.kamerleng i Kishës së
Shenjtë Romake, shpjegoi më pas Motu Proprio-n e Benediktit XVI, me të cilën ndryshojnë
disa norma të Kushtetutës “Universi Dominici Gregis”, miratuar nga Papa Gjon Pali
II në vitin 1996: “Synimi kryesor i Atit të Shenjtë, sqarohet fare mirë prej
tij: duke marrë parasysh rëndësinë e këtij problemi, të sigurohet zhvillimi më i mirë
i mundshëm i gjithçkaje, që ka të bëjë me zgjedhjen e Papës së Romës, veçanërisht,
një interpretim dhe zbatim më i saktë i disa prej normave të vetë Kushtetutës”. Atë
Federiko Lombardi theksoi se do të jenë mbledhjet e kardinjave, pas fillimit të Selisë
Vakante, ato, që do të përcaktojnë datën e Konklavit: “Natyrisht, nuk mund
të mblidhet para 1 marsit, sepse kardinjatë nuk mund të takohen para 1 marsit. Është
e nevojshme të thirren për kongregacionin e parë të përgjithshëm e, ndoshta, nuk do
të vendosin në atë mbledhje për Konklavin. Prandaj, mendoj se duhet të presim kalimin
e ditëve të para të marsit, për të pasur një vendim formal”.