Sekretaria e Shtetit të Vatikanit denoncon përpjekjet për të kushtëzuar kardinajtë
me lajme të rreme, ose të paverifikueshme
Komunikatë e Sekretarisë së Shtetit të Selisë së Shenjtë, në të cilën kritikohet roli
i mediave, në përpjekjen për të kushtëzuar zgjedhjen e Papës së ardhshëm: “Liria
e Kolegjit Kardinalor, të cilit i takon, sipas ligjit, zgjedhja e Papës së Romës,
është mbrojtur gjithnjë fuqishëm nga Selia e Shenjtë, si garanci për një zgjedhje
të bazuar mbi vlerësime, që kanë për qëllim vetëm të mirën e Kishës. Gjatë
shekujve, kardinajve u është dashur të përballojnë forma të ndryshme presioni, ushtruar
mbi zgjedhës të veçantë, ose mbi vetë Kolegjin, që kishin si qëllim kushtëzimin e
vendimeve, duke ua nënshtruar ato logjikës së tipit politik, ose tokësor. Nëse,
në të kaluarën, ishin të ashtuquajturat Fuqi, pra shtetet, që përpiqeshin të kushtëzonin
zgjedhjen e Papës, sot, hyn në lojë pesha e opinionit publik, shpesh, e bazuar në
vlerësime, të cilat nuk e kapin aspektin tipik shpirtëror të çastit, që po përpjeton
Kisha. Është për të ardhur keq që, me afrimin e kohës së fillimit të Konklavit,
kur kardinajtë me të drejtë vote, sipas ndërgjegjes e para Zotit, do t’u duhet të
shprehin lirisht vendimin e tyre, shumëfishohet përhapja e lajmeve, shpesh të paverifikuara,
ose të paverifikueshme, madje edhe të rreme, që shkaktojnë dëme të mëdha për njerëzit
e institucionet. Kurrë si në këto çaste, katolikët përqendrohen në ç’është
më thelbësore: luten për Papën Benedikti XVI, luten që Shpirti Shenjt ta shndrisë
Kolegjin e Kardinjave, luten për Papën e ardhshëm, me besim se fatet e barkës së Shën
Pjetrit janë në duart e Zotit”.