Святы Пасад заклікаў ААН прыкласці больш намаганняў для вырашэння сітуацыі ў Сірыі
800 тыс. бежанцаў
з Сірыі ў мінулым годзе і ўжо 300 тыс. у бягучым – гэта прыкладныя дадзеныя ААН, сабраныя
ў краінах, прымаючых уцекачоў: Ліване, Іарданіі, Турцыі, Іраку і Егіпце. Драматызму
гэтым лічбам дадае той факт, што 80% бежанцаў складаюць жанчыны і дзеці. У Сірыі сітуацыя
з дня ў дзень становіцца ўсё больш і больш безвыходнай. Не толькі цывільныя асобы,
але і параненыя не могуць разлічваць на разуменне з боку ваюючых груповак. Нават бальніцы
сталі мішэнню – больш за палову з іх былі пашкоджаны, а адна траціна выведзена з эксплуатацыі.
У
офісе Арганізацыі Аб’яднаных Нацый у Жэневе ў мінулыя дні адбылася нарада па гуманітарнай
сітуацыі ў Сірыі. Аднак, апроч аналізу фактаў і лічбаў, не быў дадзены адказ на найбольш
фундаментальныя пытанні аб тым, чаму няма палітычнай волі, каб спыніць хвалю радыкальнага
насілля ў апошнія два гады ў гэтай краіне. Гэта адзначыў арцыбіскуп Сільвана Тамазі,
пастаянны прадстаўнік Святога Пасаду ў структурах ААН у Жэневе, падчас свайго выступлення
на нарадзе.
“Міжнародная супольнасць павінна стварыць палітычныя ўмовы для
дыялогу з усімі зацікаўленымі бакамі - сказаў ватыканскі дыпламат. - Гэта павінна
быць зроблена такім чынам, каб прадухіліць канфлікт, які доўжыцца ўжо два гады. Калі
насілле працягне трываць, апазіцыйныя да ўраду групоўкі разам з фундаменталістамі
будуць набываць усё большае значэнне. І настолькі чаканая дэмакратычная будучыня Сірыі,
асабліва з удзелам усіх меншасцяў, уключаючы хрысціян, стане сумнеўнай. Таму справа
вельмі тэрміновая, каб міжнародная супольнасць, і асабліва сілы, якія маюць прамыя
інтарэсы ў рэгіёне, селі за стол і распрацавалі рашэнне, якое б спыніла насілле і
па крайняй меры ініцыявала палітычныя рашэнні”, - заклікаў прадстаўнік Святога Пасаду
ў ААН.