Рымская курыя з’яўляецца
адной з найменш карумпаваных і самых празрыстых інстытутаў у свеце, лічыць кардынал
Хуліан Эранс. Іспанскі пурпурат узначальваў камісію кардыналаў, якая па загадзе Папы,
павінна была высветліць справу “Vatileaks”. У інтэрв’ю газеце “El País”, ён абверг
чуткі пра тое, што адстаўка Папы можа быць звязана з інтрыгамі ў Курыі. Іншы ватыканскі
пурпурат, французскі кардынал Жан-Луі Таран, старшыня Папскай рады па міжрэлігійным
дыялогу, дзелячыся сваімі разважаннямі пасля абвяшчэння Святым Айцом аб адстаўцы,
звярнуў увагу на неацэнены ўклад Бэнэдыкта XVI ва ўдакладненне прынцыпаў дыялогу з
прадстаўнікамі іншых рэлігій, асабліва ісламам.
“Я спадзяюся, што міжканфесійны
дыялог будзе адным з прыярытэтаў будучага Папы - сцвердзіў кардынал Таран. - Бэнэдыкт
XVI зрабіў для гэтых адносін вельмі шмат, асабліва для мусульман. Ён наведаў тры мячэці
і скіраваў важныя прамовы, заўсёды клапаціўся пра тое, каб дыялог быў лаяльны, поўны
павагі, і ў той жа час не ствараючы мітусні, без рэлятывізму і сінкрэтызму. Бэнэдыкт
XVI з’яўляецца Папам усяго гэтага, вось што істотна”, - дадаў ватыканскі іерарх.
Паводле
кардынала Тарана, Пантыфік дапамог нам нанова адкрыць для сябе нашы духоўныя карані,
веру спалучаць з розумам, быць адказнымі ў веры. “Такая пастава перадаецца іншым”,
- лічыць ён. “Бэнэдыкт XVI з’яўляецца не толькі інтэлектуалам, але і містыкам. Яго
казанні вельмі тэалагічныя, але яны таксама маюць містычную крыніцу. Бэнэдыкт XVI
шмат моліцца. Не хваліцца гэтым, але сапраўды шмат моліцца”, - падзяліўся старшыня
Папскай рады па міжрэлігійным дыялогу.