Ֆրանսացի Երեսփոխանը Թուրքիոյ Կոչ Կ՛ուղղէ Սեփական Անցեալի Հետ Հաշուի Նստելու Եւ Ճանչնալու
Հայոց Ցեղասպանութիւնը
Ֆրանսայի խորհրդարանի անդամ, Ֆրանսա-Հայաստան խորհրդարանական բարեկամութեան խմբակի փոխնախագահ
Ֆրանսուա Ռոշպլուան «Արմենփրես» լրատու գործակալութեան հետ զրոյցի մը ընթացքին նշած է,
թէ Հայոց ցեղասպանութեան ժխտումը քրէականացնող օրինագիծը Ֆրանսայի մէջ անպայման պէտք
է որդեգրուի մինչեւ 2015-ի ապրիլ 24-ը` Հայոց ցեղասպանութեան 100-ամեակը` աւելցնելով,
որ ինք շատ կը փափաքի այդ օր Հայաստանի մէջ ըլլալ: Ան յոյս ունի, որ Հայոց ցեղասպանութեան
ժխտումը քրէականացնող բանաձեւը չի մերժուիր: Ան նաեւ յոյս ունի եւ կը հաւատայ, որ Ֆրանսայի
նախագահ Ֆրանսուա Հոլլանտ նախագահ Նիքոլա Սարքոզիի պէս պիտի վարուի: «Այս ծիրին մէջ պիտի
ուզէի նշել կատաղի, անհաւանական ճնշումները թրքական կառավարութեան կողմէ: Իմ կարծիքովս,
բացարձակապէս անընդունելի է, որ Թուրքիան միջամտէ Ֆրանսայի ներքին գործերուն: Ֆրանսացի
երեսփոխաններու իրաւունքն է քուէարկել այս կամ այն օրինագիծի օգտին», ընդգծած է ան: Ռոշպլուան
ցաւով նշած է, որ Հայոց ցեղասպանութեան միջազգային ճանաչման հոլովոյթը այնքան արագ չի
զարգանար, որքան պէտք է: Բայց եւ այնպէս, կը կարծէ, որ եթէ Միացեալ Նահանգներ ճանչնան
Հայոց ցեղասպանութիւնը, շատ երկիրներ պիտի հետեւին անոր օրինակին: «Ահա թէ ինչու, մենք
շատ հպարտ ենք, որ Ֆրանսան Հայոց ցեղասպանութիւնը ճանչցած երկիրներէն է», յայտնած է ան: Ան
նաեւ յոյս յայտնած է, որ Թուրքիա շուտով ճանչնայ Հայոց ցեղասպանութիւնը, որ կազմակերպուած
էր Երիտասարդ թուրքերուն ձեռամբ: «Եւ ատիկա լաւ սկիզբ պիտի հանդիսանայ հայ-թրքական յարաբերութիւններու
կարգաւորման համար: Ամօթ բան չկայ Հայոց ցեղասպանութեան ճանաչման մէջ: Ատիկա բան մըն
է, որ պէտք է կատարուի Թուրքիոյ կողմէ` պատասխանատուութիւն ստանձնել եւ հաշուի նստիլ
սեփական անցեալին հետ», ընդգծած է ֆրանսացի երեսփոխանը: