Кардынал Каспер аб будучым Папе і патрэбах Касцёла
Магчыма, што мы не
хутка будзем мець Папу з такім інтэлектуальным і духоўным узроўнем, як у Бэнэдыкта
XVI. Такое меркаванне выказаў удзельнік будучага канклаву кардынал Вальтэр Каспер.
Іерарх на працягу доўгіх гадоў быў старшынёй Папскай рады спрыяння хрысціянскаму адзінству.
У інтэрв’ю італьянскай “Corriere della sera” ён адзначыў, што Бэнэдыкт XVI увойдзе
ў гісторыю перш за ўсё дзякуючы намаганням па ўмацаванні веры Касцёла. Кардынал Каспер
падкрэсліў, што Папа пакідае вялізарную і багатую спадчыну. Будучы Пантыфік, паводле
іерарха, павінен быць чалавекам веры і моцнай духоўнасці, чалавекам, які мае харызму
і зможа павесці за сабой вернікаў, сапраўдным пастырам для людзей, але таксама пастырам,
здольным кіраваць Касцёлам. Ён павінен ведаць Паўсюдны Касцёл. Не дастаткова ведаць
толькі адну краіну ці асаблівую дыяцэзію”, - адзначыў кардынал Каспер.
Гаворачы
аб неабходных рэформах у Рымскай курыі, кардынал Каспер адзначыў, што на сённяшні
дзень ёсць патрэба ў лепшай арганізацыі, якая дазволіць адказваць на выклікі нашага
часу. “Неабходна лепшае супрацоўніцтва паміж дыкастэрыямі, больш калегіяльнасці і
камунікацыі. Часта правая рука не ведае, што робіць левая!”, - сказаў ён і дадаў,
што асаблівым чынам неабходна паразважаць аб працы сінодаў, таму што многія біскупы
не задаволены тым, як яны праходзяць. Прычына гэтага часта заключаецца ў тым, што
іх тэмы “вельмі агульныя” і не тычыцца тэрміновых праблем Касцёла. Кардынал Каспер
прывёў прыклад апошняга Сінода па новай евангелізацыі. Паводле яго, праблема была
актуальнай, але ў той жа час, яе вырашэнне на розных кантынентах адрозніваецца. “Трэба
разглядаць канкрэтныя сітуацыі”, - сказаў ён.