Papa: Paolucci, ende nuk ka udhëzime për mbylljen e kapelës Sikstina për Konklavë
Ende nuk dihet saktësisht data e mbylljes së Kapelës Sikstina në Vatikan për t’i lënë
vendin fillimit të punimeve të Konklavës për zgjedhjen e Papës së ri. “Tani për tani
nuk kam marr udhëzime rreth mbylljes së Kapelës Sikstina. Jam në pritje të një komunikimi
zyrtar”, tha drejtori i Muzeve të Vatikanit, Antonio Paolucci. Nën qemerin e pikturuar
me afreske nga Michelamgelo, 117 kardinaj do të mblidhen për zgjedhjen e pasardhësit
të Benediktit XVI, i cili më 11 shkurtin e kaluar njoftoi Kolegjin kardinalor për
tërheqjen e tij nga papnia. Kujtojmë se Kapela Sikstine nuk është tjetër
veçse Kapela e Madhe, e themeluar në vitin 1357 nga Urbani V, rindërtuar nga Siksti
IV, nga i cili mori edhe emrin ndërmjet viteve 1475 – 1480. Muret anësore u pikturuan
me afreske nga piktorë të famshëm toskanë e umbrë, si Pinturikio, Cosimo Rosselli,
Botticelli, Ghirlandaio e Perugino. Balaustra, që e ndan më dysh Kapelën dhe këngtoria
janë vepër e Mono da Fiesole, Giovanni Dalmatas e Bregnois. Më pas këtu punoi kryeveprat
e veta Mikelanxhelo Buonarotti, i ngarkuar me këtë detyrë nga papa Juli II. Qe ai
që, duke mbuluar afreskun e Peruxhinos, realizoi, nën papninë e Palit III, në faqen
e murit të Elterit, veprën e famshme “Gjyqi Universal” dhe vijoi të punojë edhe në
mjedise tjera të kapelës. Në qendër të afreskut është Krishti gjykatës së
bashku me Virgjërën Mari; rreth tyre, një lëvizje formash njerëzore: të vdekur që
rigjejnë trupat e tyre, të tjerë në ngjitje drejt qiellit, shenjtorë të panjohur ose
të njohur nga mjetet me të cilat u munduan, engjëj, fanfara engjëllore, legjione qiellore
që rrokullisin në ferr shpirtra të dënuar, të cilët luftojnë me dëshpërim për të shpëtuar
nga djajtë. Pamje madhështore, para së cilës papa Pali III kremtoi për herë të parë
lutjet mbrëmësore. Pikërisht gjatë këtyre lutjeve Gjyqi Universal u zbulua para syve
të mrekulluar të të pranishmëve. E edhe sot e kësaj dite mrekullohet çdo sy, që e
shikon këtë kryevepër të papërsëritshme arti, disa prej figurave lakuriqe të së cilës
qenë veshur nga Daniele da Volterra, me urdhër të Piut IV, në vitin 1565. Kapela
është restauruar disa herë, për shkak të dëmtimit nga tymi i qirinjve, nga lagështira
që hyn prej çatisë dhe elementë të tjerë. Reastaurimi i fundit, nën papninë e Gjon
Palit II, zgjati 13 vjet e përfundoi me një kremtim solemn eukaristik më 6 prill
1994.