Ըստ Նախնական Արդիւնքներուն Սերժ Սարգսեան Ստացաւ Քուէներուն 58 Առ Հարիւրը, Իսկ Րաֆֆի Յովհաննիսեան` 32 Առ Հարիւրը

Երէկ Հայաստանի նախագահական ընտրութեան աւարտէն ետք «Կոլլըփ» կազմակերպութեան կատարած էքզիթ փոլին իբրեւ արդիւնք, ընտրութեան նախնական տուեալներով նախագահ Սերժ Սարգսեան ստացած էր քուէներուն 58 առ հարիւրը, իսկ Րաֆֆի Յովհաննիսեան` 32 առ հարիւրը: Զանազան կայքէջեր եւ Հայաստանի Կեդրոնական ընտրական յանձնախումբը պարբերաբար կը հրապարակէին տարբեր տուեալներ: Ըստ elections.am կայքէջին, այսօր առաւօտեան ժամը 1:00-ի տուեալներով Սերժ Սարգսեան ստացած էր քուէներուն 60.99 առ հարիւրը (477,407 քուէարկող), իսկ Րաֆֆի Յովհաննիսեան` 34,34 առ հարիւրը (268,768 քուէարկող): Ընտրութեան մասնակցեցաւ քուէարկողներուն 60,05 առ հարիւրը` 1,518,407 հոգի:
Երէկ առաւօտեան ժամը 8:00-ին (Երեւանի ժամանակացոյցով) Հայաստանի Հանրապետութեան տարածքին բացուեցան ընտրատեղամասերը` կատարելու համար Հայաստանի նախագահական ընտրութիւնը. քուէարկութիւնը շարունակուեցաւ մինչեւ երեկոյեան ժամը 20:00:

Քուէաթերթիկներուն վրայ ընդգրկուած էին 7 թեկնածուներու անուններ` Ազգային ժողովի Հայ ազգային քոնկրես խմբակցութեան պատգամաւոր, Ազատութիւն կուսակցութեան նախագահ, Հայաստանի նախկին վարչապետ Հրանդ Բագրատեան, Ազգային ինքնորոշում միաւորման առաջնորդ Պարոյր Հայրիկեան, Ժառանգութիւն կուսակցութեան առաջնորդ, Հայաստանի նախկին արտաքին գործոց նախարար Րաֆֆի Յովհաննիսեան, «Ռատիօ հայ»-ի տնօրէն, քաղաքագէտ Անդրէաս Ղուկասեան, Լեռնային Ղարաբաղի նախկին արտաքին գործոց նախարար Արման Մելիքեան, Հայաստանի գործող նախագահ, իշխող Հանրապետական կուսակցութեան առաջնորդ Սերժ Սարգսեան, ոչ մէկ տեղ աշխատող եւ իբրեւ դիւցազնագէտ ներկայացող Վարդան Սեդրակեան:
Սահմանադրութեան համաձայն, նախագահ կ՛ընտրուի այն թեկնածուն, որուն թեր կը քուէարկեն բոլոր թեկնածուներուն թեր քուէարկած ընտրողներու թիւին կէսէն աւելին:
Ոստիկանութեան հրապարակած տուեալներով, Հայաստանի ընտրողներուն թիւը 2,505,980 է:
Հայաստանի նախագահը կ՛ընտրուի հինգ տարուան ժամկէտով: