Kardinal Vallini i fton besimtarët e Romës të marrin pjesë në Audiencën e Përgjithshme
të fundit të Benediktit XVI
Vikari i dioqezës së Romës, kardinali Agostino Vallini, në një notë drejtuar sot “të
gjithë besimtarëve të dioqezës së Romës”, i nxittë gjithë besimtarët të mblidhen
përreth Papës Benediktit XVI, të mërkurën më 27 shkurt në Sheshin e Shën Pjetrit në
Vatikan, me rastin e “Audiencës së fundit të Përgjithshme të Papnisë së tij”. E këtë
takim të ardhshëm e të fundit të Benediktit XVI me besimtarë, kardinali Vallini e
konsideron një takim ngjarje si “një moment domethënës për jetën e Kishës e të dioqezës
sonë për t’i shpreh edhe një herë dashurinë tonë e devocionin tonë Atit të Shenjtë
dhe për t’iu lutur me Të e për Të Zotit tonë Jezu Krisht, Bariut të amshuar të Kishës”,
shkruan kardinali Vallini duke i ftuar besimtarët të marrin pjesë në takimin e fundit
me Papën Benediktit XVI, një ditë para tërheqjes së tij nga udhëheqja e Kishës. Kujtojmë
se Audienca e Përgjithshme e fundit e Papës Benediktit XVI do të mbahet paradite më
27 shkurt në Sheshin e Shën Pjetrit në Vatikan, e nuk është parashikuar asnjë biletë
hyrëse, siç ndodh zakonisht të Audienca të Përgjithshme. Pra hyrja është pa bileta,
pikërisht për të mundësuar pjesëmarrjen e të gjithë atyre besimtarëve që duan të përshëndesin
Papën.