Канклаў можа пачацца раней прадугледжанага тэрміну
Больш за 35 тыс. чалавек
зарэгістраваліся для ўдзелу ў апошняй агульнай аўдыенцыі з Бэнэдыктам XVI, якая пройдзе
27 лютага на плошчы св. Пятра. Пра гэта паведаміў кс. Ламбардзі на брыфінгу, які прайшоў
16 лютага ў Зале Друку Апостальскай Сталіцы. Ён расказаў, што ў Кастэль-Гандольфа
Бэнэдыкт XVI будзе прабываць з 28 лютага да канца красавіка - пачатку мая 2013 г.
Гэта звязана з неабходнасцю закончыць рамонт і ўпарадкаваць кляштар “Mater Ecclesia”
у Ватыкане, дзе будзе жыць Святы Айцец. Што тычыцца перыяду “sede vacante”, то паводле
кіраўніка Залы Друку, камерленг і яго супрацоўнікі ўжо пачалі рыхтавацца да гэтага
часу. У бліжэйшыя дні, яшчэ да заканчэння пантыфікату, будзе дадзена першая падрабязная
інфармацыя. Кс. Ламбардзі адзначыў, што для пачатку канклава прадугледжаны пэўны перыяд
чакання. Аднак, у сувязі з тым, што ўсе кардыналы ведаюць аб даце заканчэння пантыфікату
Бэнэдыкта XVI, магчыма, яны змогуць прыбыць у Рым раней. У такім выпадку “няма сэнсу
чакаць” вытрымліваючы час да пачатку канклава, калі ўсе яго ўдзельнікі будуць у Вечным
горадзе. Паводле кс. Ламбардзі, такое меркаванне выказалі некаторыя кардыналы.
Адказваючы
на пытанне журналістаў, чаму Папа застаецца ў Ватыкане і не едзе ў Баварыю, езуіт
адзначыў, што для гэтага існуюць “зразумелыя прычыны лагістычнага і арганізацыйнага
характару”. Акрамя таго, ён падкрэсліў, што знаходжанне Папы ў Ватыкане мае носіць
вялікае рэлігійнае значэнне.
Кс. Ламбардзі паведаміў таксама, што Пітэр Зеевальд,
аўтар некалькіх кніг-інтэрвью з Бэнэдыктам XVI, плануе напісаць біяграфію Пантыфіка.
У мінулым годзе паміж імі адбылося некалькі размоў, матэрыялы якіх і лягуць у аснову
новай кнігі.