«Հայ Մայրը` Մեծագոյն Դաստիարակն Է Հայ Մարդուն» Այսպէս պատգամեց
Արամ Ա. Կաթողիկոսը, Հանդիսապետելով` Տեառնընդառաջի Նախատօնակին։ Չորեքշաբթի, 13 փետրուարի
երեկոյեան, Տեառնընդառաջի տօնին նախօրեակին, Անթիլիասի մայրավանքը լեցուն էր, հաւատացեալներու
եւ յատկապէս ծնողներու ու մանուկներու հսկայ բազմութեամբ: Ծնողներ եկած էին իրենց
զաւակներուն հետ` մասնակից դառնալու Յիսուս Մանուկի քառասնօրեայ տաճար ընծայումի խորհուրդին: Վեհափառը
ողջունելէ ետք՝ հոծ բազմութիւնը մայրավանքին մէջ, անդրադարձաւ աւետարանական դրուագին
՜՜Ընծայումի՝՝ աւանդութեան, ապա, ընդգծեց երկու գլխաւոր կէտեր. «1) Մօր դաստիարակիչ
հոգածութիւնը իր զաւկին նկատմամբ: Մեր եկեղեցւոյ աւանդութիւնները յարգելով, մենք
մեր զաւակները կը կրթենք մեր բարոյական, հոգեւոր ու ազգային արժէքներով: 2) Մայրը
մեծագոյն ու մնայուն դաստիարակն է իր զաւկին: Այսպէս եղաւ Սուրբ Մարիամ Աստուածածինը`
միշտ մնալով իր զաւակին` Յիսուսի կողքին: Այդպէ՛ս պէտք է ըլլայ հայ մայրը: Հայ մայրը
իր զաւկին առաջին ու մնայուն դաստիարակն է: Դպրո՛ց է հայ մայրը, որուն միշտ պէտք է աշակերտի
իր զաւակը: Այսօր կրկնապատկուած է հայ մօր դերը` իբրեւ դաստիարակիչ իր զաւակներուն
ապականիչ եւ այլասերիչ հովերու ու փոթորիկներու դիմաց : Արամ Ա. անդրադարձաւ նաեւ
2013-ը «Հայ մօր տարի» հռչակելու նպատակին, եւ շեշտեց Հայ մօր կարեւոր դերակատարութիւնը
մեր եկեղեցական-ազգային կեանքին մէջ` իբրեւ ապագայ սերունդներուն առաջին ու մնայուն դաստիարակիչը: Տեառնընդառաջի
արարողութենէն ետք, հայ եկեղեցւոյ դարաւոր աւանդութեան համաձայն, վեհափառ հայրապետը մայրավանքի
շրջափակին մէջ վառեց աւանդական խարոյկը: Ապա միաբան հայրերն ու դպրեվանեցիները հոգեւոր
եւ ազգային երգերով խանդավառեցին ներկայ ժողովուրդը: Աւարտին, հազարաւոր հայորդիներ իրենց
վառած մոմերը իբրեւ օրհնութիւն տարին իրենց տուները: