Պենետիկտոս ԺԶ Սրբազան Քահանայապետի Գործունէութիւնը։
''28 Փետրուարին Հրաժեշտի Հանդիպում Կարդինալական Դասին հետ։''

Ուրբաթ 15 փետրուար 2013-ի առաւօտեան ժամը 11-ին, Պենետիկտոս ԺԶ Սրբազան Քահանայապետը իր գրասենեակի մէջ ընդունեց Ռումանիոյ Հանրապետութեան Նախագահ` Տիար Թրաեան Պազէսքու ու ապա ունկնդրութիւն շնորհեց Իտալիոյ Լիկուրիա Մարզի եպիսկոպոսական համահաւաք դասի անդամ` 7 եպիսկոպոսներուն որոնք հռոմ ժամանած են իրենց հնգամեայ կանոնական այցելութիւնը կատարելու Սուրբ Պետրոսի յաջորդին։

Յայտնենք որ Լիկուրիայի եկեղեցական Մարզը կ՛ընգրկէ Ճէնովայի, Ալպէնկայի, Գիավարիի, Լա Սբէցիայի, Սավոնայի, Թորթոնայի եւ Վէնթիմիլիայի թեմերը։ Մարզը ունի 6851 քմ քառակուսի տարած եւ 1.924,763 բնակչութիւն։ Մարզին 7 թեմերը ունին 1251 ժողովրդապետութիւններ, ուր իրենց ծառայութիւնը կը մատուցեն 1453 կուսակրօն քահանաներ եւ 121 սարկաւագներ։

Ժամը 12,15-ին Պենետիկտոս ԺԶ ունկնդրութիւն շնորհեց ''Սուրբ Պետրոսի Աթոռի ի նպաստ'' Հիմնարկի անդամներուն։

Յայտնենք թէ կիրակի 17 փետրուարին, Վատիկանի Րէտէմթորէս Մաթեր մատրան մէջ, սկիզբ կ՛առնեն քառասնորդաց շրջանի մէկ շաբաթ տեւող (մինչեւ 23 փետրուար) Հոգեւոր Կրթութիւնները, զոր պիտի քարոզէ Մշակոյթի Քահանայապետական Խորհուրդի Նախագահը` Կարդինալ Ճանֆրանքօ Ռավազին։ Սոյն Հոգեւոր կրթութիւններուն կը մասկացի նաեւ Պենետիկտոս ԺԶ Սրբազան Հայրը։

Վերոյիշեալ շաբթուայ ընթացքին Քահանայապետական գործունէութիւնները դադրած կը նկատուին ներառեալ 20 փետրուարի չորեքշաբթի օրուայ հրապարակային ունկնդրութիւնը։

Նշենք նաեւ որ չորեքշաբթի 27 փետրուարին Պենետիկտոս ԺԶ Սրբազան Քահանայապետը իր վերջին հրապարակային ունկնդրութիւնը կը կատարէ Սուրբ Պետրոսի հրապարակի վրայ, մինչ հինգշաբթի 28 փետրուարի առաւօտեան ''ողջերթի'' հանդիպում մը կ՛ունենայ Կարդինալական դասին հետ ու ապա երեկոյեան՝ (ժամը 5-ին) ինքնաթիռով Վատիկանէն կը մեկնի, հաստատուելու համար Քահանայապետական ամարանոցը` Գաստել Կանտոլֆօ մինչեւ նոր Քահանայապետի ընտրութիւնը։