Кардыналы прызначылі новага кіраўніка Ватыканскага банка

15 лютага Камісія кардыналаў, якая апякуецца Інстытутам рэлігійных спраў, больш вядомым, як Ватыканскі банк, прызначыла новага старшыню гэтай фінансавай установы. Ім стаў нямецкі адвакат і фінансіст, член Мальтыйскага ордэна Эрнст фон Фрэйберг. Новы кіраўнік Інстытута рэлігійных спраў нарадзіўся ў 1958 г. Вывучаў права ва універсітэтах Мюнхена і Бона. Ён жанаты і з’яўляецца адным з кіраўнікоў Асацыяцыі пілігрымак у Лурд Берлінскай архідыяцэзіі. Як адзначаецца ў спецыяльным паведамленні Залы Друку Апотальскай Сталіцы, рашэнне аб яго прызначэнні было прынята ў выніку ўважлівага разгляду і кансультацый, якія праводзіла Калегія Кардыналаў пры падтрымцы Назіральнай рады. Гаворка ідзе пра працэс, які адбываўся на працягу некалькіх месяцаў і дазволіў ацаніць многія бакі высокага прафесійнага і маральнага ўзроўню новага кіраўніка. Адзначаецца таксама, што кардыналы звярталіся за дапамогай да незалежнага міжнароднага агенцтва – лідэра ў сферы падбору кандыдатаў для кіравання вялікімі ўстановамі. “Святы Айцец, які ўважліва назіраў за працэсам выбару новага старшыні Назіральнай рады Інстытута рэлігійны спраў, выразіў сваю поўную згоду з рашэннем Камісіі Кардыналаў”, - гаворыцца ў апублікаваным паведамленні.