14 лютага ў Ватыканскіх
музеях адбылася прэзентацыя першага ў гісторыі турыстычнага даведніка па Ватыкану.
Гаворка ідзе пра падрабязнае апісанне тэрыторыі, на якой сканцэнтравана самая вялікая
ў свеце колькасць культурных аб’ектаў: палацаў, садоў, помнікаў. Аб кожным з іх распавядае
асобны аўтар – спецыяліст у той ці іншай галіне мастацтва, архітэктуры ці гісторыі
ланшафтаў. Даведнік, аб’ёмам амаль ў 500 старонкак, напоўнены старажытнымі і сучаснымі
выявамі, дакладнымі апісаннямі і інфармацыяй аб магчымасці наведвання аб’ектаў у ім
прадстаўленых. Пакуль выданне існуе на 6 мовах, а ў будучыні плануецца стварэнне яго
электроннай версіі. Дырэктар Ватыканскага выдавецтва кс. Джузэппэ Коста адзначыў,
што даведнік з’яўляецца вынікам увагі Бэнэдыкта XVI да культуры. “Святы Айцец заўсёды
падкрэсліваў важнасць прыгажосці і мастацтва, таму што яны набліжаюць да Бога”, -
сказаў святар.
Аб адной з частак даведніка, прысвечанай Ватыканскім садам,
расказала ў інтэрв’ю нашаму радыё яе аўтар Альберта Кампітэлі. Яна звярнула ўвагу
на тое, што Ватыкан будаваўся паступова і кожны Пантыфік імкнуўся пакінуць пасля сябе
асаблівы след. Гэта тычыцца таксама і Ватыканскіх садоў.
“Сады займаюць не
маленькую частку, але палову дзяржавы: 22 га, якія вельмі змяняліся на працягу тысячагоддзя.
Разглядаючы гісторыю садоў, можна разглядаць гісторыю Касцёла, гісторыю розных Папаў,
які змянялі адно аднаго на пасадзе св. Пятра. Сады былі ў блізкай сувязі з будынкамі,
і такім чынам заўсёды былі іх дапаўненнем і ўпрыгожваннем”, - сказала Альберта Кампітэлі.
Даследчыца
падкрэсліла, што некаторыя сады не захаваліся да сённяшняга дня, бо на іх месцы былі
ўзведзены розныя пабудовы, аднак з дапамогай даведніка яшчэ можна ўбачыць іх амаль
незаўважныя сляды.